15 de septiembre de 2011

EAJ-PNVK GIPUZKOAKO FORU ALDUNDIARI ZEHAZTASUN FALTA EGOTZI DIO, JARRAITU BEHARREKO ILDO ESTRATEGIKOAK AZALTZERAKO ORDUAN.

Markel Olano batzorde aretoan
Jeltzaleen batzarkide taldeko bozeramaile Markel Olanok ondorengoa ohartarazi du: “Inprobisazioan erortzeko arrisku handia dago, plangintza estrategikoak aurrera eramateko orduan planifikaziorako tresna egokiak martxan jartzen ez badira”.

EAJ-PNV batzarkide taldeko bozeramaile Markel Olanok esan duenez, “ez dugu ikusi ez metodologiarik, ez tresna berriak jartzeko asmorik, Gipuzkoako Foru Aldundiaren gobernu berriak Gipuzkoan garatu nahi dituen ildo estrategikoak aurrera eramateko orduan”. Martin Garitano Diputatu Nagusiak Gipuzkoako Batzar Nagusietako Araudia, Instituzioak eta Gobernuko Batzordean egin duen agerraldian egin ditu adierazpenak talde jeltzalearen bozeramaileak.

Ildo berean, Olanoren iritziz, “Gipuzkoako Foru Aldundiak jarraituko dituen ildo estrategikoak azaltzerako orduan zehaztasun falta nabarmena dago”; eta honakoa gaineratu du: “Nahiz eta gobernura iritsi zirenetik ia hiru hilabete pasa diren, eta asko zehazteko denborarik izan ez duten, aurreko gobernuak kudeaketa plana martxan jarri zuen (2007-2011), non legealdian zehar burutuko ziren proiekturik garrantzitsuenak, helburuak, lehentasunak, tresnak, baliabideak eta ebaluazioa definitzen ziren”.

Halaber, Markel Olanok segidakoa ohartarazi du: “Inprobisazioan erortzeko arrisku handia dago, plangintza estrategikoak aurrera eramateko orduan planifikaziorako tresna egokiak martxan jartzen ez badira”. Honenbestez, Gipuzkoako Foru Aldundiari ondorengoa eskatu dio: “Esaten duen aldaketa izpiritua aurrera eramateko, ezinbestekoa da tresna zehatzak ezartzea; izan ere, inprobisazioak aldaketa txarrerako izatea egingo du”.

No hay comentarios:

Publicar un comentario