ETXEGARATEN KAMIOIENTZAT BIDESARIA JARTZEKO ESKATU DIO EAJK BILDURI, URTEAN 53 MILIOI EURO LORTUKO LIRATEKEELA ARGUDIATUTA

“Larraitz Ugartek Bidegiren inguruan egindako aurreikuspenak bertan behera gelditu dira”, adierazi du Aintzane Oiarbide batzarkideak

N-1 errepidean, Etxegarate parean, ibilgailu astunentzako bidesaria jartzea proposatu du Gipuzkoako EAJk, neurri horrekin urtean 53 milioi euro bilduko liratekeela argudiatuta, “lurralde oreka eta trafiko fluxuen oreka” bultzatzeaz gain. EAJk aurreko legealdian proposatu zuen aipatutako neurria, eta orain kalkulu zehatzak aurkeztuz osatu du. 10.000 kamioi igarotzen dira egunero Donostia-Gasteiz ibilbideko Gipuzkoako zatitik, eta jeltzaleen arabera, bidesaria urte hasieran martxan jarri izan balitz, 40 milioi euroko errekaudazioa izango zen dagoeneko.

Markel Olano EAJko Batzar Nagusietako bozeramaleak eta Aintzane Oiarbide batzarkideak dei egin diote Bilduri neurri hori har dezan, legealdi osoa kontutan hartuta, 212 milioi euroko diru-sarrerako lortzeko balio izango lukeelakoan. “Zoritxarrez, prest daude diru hori zakarrontzira botatzeko aurreko legealdian egindako lana bertan behera utzi eta historia beraiekin hasi den itxura emateko”, salatu du Olanok. Era berean, Oiarbidek azaldutakoaren arabera,  EAJk bertako garraiolariei pizgarri fiskala eskaintzea proposatu du neurriaren eragina aritzeko, baina “Gipuzkoako Foru Aldundiak ez du kontuan hartu”.

Olanoren esanetan, Batzar Nagusietan errepideen inguruan egindako ponentziak “porrot” egin du eta ez du “inolako ondoriorik” atera. “Bilduren jarrera ihes egitea izan da, ez duelako bere eredua argitu, eta are larriagoa dena, ponentziaren bileretan Larraitz Ugartek bereak esan du ez dutela argituko. Lotsagarria iruditzen zaigu gobernu ardura duen norbaitek horrela jokatzea”. 

Bozeramale jeltzalearen arabera, bere asmoak ezkutatu nahian dabil Bildu: “Gipuzkoar guztiontzat errepideen zerga berria jarri nahi dute, salbuespenik gabe”. Neurri horren aurka gogor egin dute jeltzaleek: “Gaur egun, gipuzkoarrok ordaintzen ditugu errepideak beren osotasunean, zergen, bidesarien, eta zirkulazio zergaren bitartez. Hori da daukagun desorekarik handiena. Eta orain horri zerga berri bat erantsi nahian dabiltza”, ohartarazi du Oiarbidek.  “Gipuzkoarron poltsikoak hustu nahi dituzte, eta bitartean, garraio astunak, atzerritik datorrena neurri handi batean, euro bakar bat ordaindu gabe eta errepideen mantenuan lagundu gabe jarraitzen du, kostu handia eragin arren”.

Bilduri “demagogian” aritzea leporatu dio Olanok, AP-1 eta AP-8 autobideak erabiltzeagatik 25 euroko muga jarriko duela “lau haizeetara iragartzerakoan”, hain zuzen. “Gu ados gaude neurri horrekin, lurralde oreka bultzatzen duelako,  baina ezin da ahaztu urtean dirusarrerak 1’5 milioi eurotan jaistea ekarriko lukeela, eta legeladi osoan, berriz, 6 milioitan. Bilduk ez du esaten nolako neurriak hartu behar dituen egoera horri konponbidea emateko, eta ez du zerga berriaz hitz egiten ez litzatekeelako batere ‘popularra’ izango”. Hori dela-eta, iragarri du EAJk emendakina sartuko duela “25 euroko muga ezartzeko onartu nahi duten Foru Arauan”, arau horrek Etxegarateko bidesaria martxan jartzea aurreikus dezan.

Oiarbidek, berriz, Larraitz Ugarte diputatuari egotzi dio “legealdi hasieratik Bidegiren finantzazioaren inguruan diskurtsu maltzurra eta asmo txarrekoa” lantzea, “EAJri min egin eta bere irudia kaltetu asmoz, Bidegiren solbentzia zalantzan jarriz”. Adierazi du aurreikuspen ilun horiek ez direla bete: “Argi eta garbi utzi du hori ponentzian Bidegiko finantza zuzendariak, erakutsi baitu trafiko fluxuak jaitsita ere Bidegik badituela tresnak galera horiek orekatzeko Foru Aldundiaren altxortegira jo beharrik gabe”.

Ildo horretan, Larraitz Ugartek berak Bidegiko Kontseiluari joan den abuztuaren 16an bidalitako gutuna aipatu du Oiarbidek: “Bertan espreski esaten du lehen seihilabeteko dirusarrera datuak ez direla hain txarrak izan. Bidesarien dirusarrerek %0,75 egin dute behera, 348.877 euro, baina zerbitzu-esparruetako dirusarrerek %10,78 egin dute gora, hau da, 590.000 eurotan.  Kontuan hartu behar da gainera hor ez dela opor garaia zenbatu, eta bidesarien dirusarrerak nabarmen handitzen direla aipatutako garaian.  Beraz, argi gelditzen da Ugarteren aurreikuspen beltzek ez zutela inolako funtsik”.

Gaineratu duenez, Bilduren “helburu bakarra” bukatu berri den errepideen ponentzian aurreko ponentziak egindako lana bertan behera uztea izan da: “Ponentziaz aldatu eta organu politiko gisa erabili besterik ez dute egin, gehiengo berriekin. Ez dute irakurri aurrekoaren lana eta ezta ateratako ondorioak ere”. Batzarkide jeltzalea harriturik azaldu da ildo horretan: “Ez dugu ulertzen Bilduk eta Aralarrek ponentziaren emaitzarekin gustura daudela esatea, inolako kontsentsurik lortu ez dutenean, aurreko legealdian ez bezala. Zentzugabekeria hutsa da. Zerbaitegatik azken bileran ez zen Foru Gobernuko ordezkari bakar bat ere egon”.

Bilduri “bere eredua argitzeko” eskatuz amaitu dute agerraldia: “Beldur gara, ordea, foru arauen bitartez onartuko dituela neurriak, Ppren babesarekin”.