EAJ-PNV-K AURREKONTUARI 63 ZUZENKETA EGIN DIZKIO, BERTAN DAUDEN HUTSUNEAK HOBETZEKO ETA AURREKONTUA OSATZEKO

Batzarkide-talde jeltzalearen bozeramaile Markel Olanoren ustez, lehentasunak ezartzeko unea da eta, ondorioz, EAJ-PNVk uste du ezinbestekoa dela krisiari aurre egiteko plangintza zehatza egitea eta, era berean, Gipuzkoako hainbat ekimen eta proiektu estrategikoak sustatzea.

EAJ-PNVren batzarkide-taldeak 63 zuzenketa egin dizkio Gipuzkoako Foru Aldundiaren aurrekontuari. Jeltzaleen bozeramaile Markel Olanok azaldu duenez, EAJ-PNV zuzenketak egin ditu Bilduri 2014ko aurrekontua negoziatzeko proposamenaz baliatuta, eta bi multzotan sailkatu ditu: alde batetik, EAJ-PNVk 15 milioi euroko aurrekontu-saila egiteko proposatu dio Bilduri, krisiari aurre egiteko; eta, bestetik, 5 milioi euro proposatu dizkio Gipuzkoarentzat garrantzitsuak diren hainbat arlotan”.  Horiek horrela, EAJ-PNV batzarkide taldearen bozeramaileak esan du, lehentasunak ezartzeko unea dela eta, ondorioz, EAJ-PNVk uste due ezinbestekoa dela krisiari aurre egiteko plangintza zehatza egitea. Hain zuzen ere, planteamendu askoz handiagoa Gipuzkoako enpresei krisiari aurre egiten laguntzeko – gogoan izan, enpresak direla Gipuzkoako ekonomiaren eragileak –. 

5 milioi euroko zuzenketak

Era berean, EAJ-PNVk proposatutako 5 milioi euroko zuzenketei buruz hitz egin du Markel Olanok: “Zuzenketa horiek egin ditugu aurrekontua hobetzeko eta osatzeko, hain zuzen ere, Foru Aldundiaren hainbat sailetan atzeman ditugun hainbat hutsune hobetzeko eta osatzeko”. Hortaz, Olanok segidakoa aditzera eman du: “Bilduren aginteko Foru Aldundiari eskatu diogu milioi bat euroko aurrekontu-saila egiteko zahar-egoitzetako itxarote-zerrendei aurre egiteko. Gai hau lehentasuna da EAJ-PNVrentzat, izan ere, lehengo legealdian EAJ-PNVk konpromisoa hartu zuen Irun eta Elgoibarko zaharren egoitzen eraikuntza egiteko, gero eta handiagoa zen itxarote-zerrendari aurre egiteko. Baina aitzitik, orain, Bilduren aginteko Foru Aldundiak ez du ezer egin, hau da, ez du ez zahar-egoitza horiek eraiki, ez leku berriak sortu dauden zahar-egoitzetan”.

EAJ-PNVren batzarkide-taldearen bozeramaileak, halaber, azpimarratu du, jeltzaleek Bilduren foru gobernuari eskatu diotela, gutxi gorabehera milioi bat eta erdi euroko aurrekontu-saila egiteko, besteak beste, Gipuzkoarentzat garrantzitsuak diren segidako proiektu zein ekimenetarako: Inbiomed (350.000 €), Basque Culinary Center (100.000 €), Euskaltzaindia – Luis Villasante eraikuntza (106.048 €), Soziolinguistika klusterra (57.930 €), Aranzadi (100.000 €), Donostia Internacional Physics Center (220.000 €), Biodonostia (100.000 €), Bic Berrilan enpresak berriak sortzeko gunea (280.000 €), Gure esku dago (100.000 €) eta Eusko Jaurlaritzaren Bake eta Bizikidetza plangintzako “Bonos Elkarrekin programa” (100.000 €).

Gainera, Markel Olanok segidakoa zehaztu du: “Gipuzkoako Nekazariek eta abeltzainek ere behar dute bere jarduerarekin jarraitzeko diru-laguntzak osatzea. Hori dela eta, aurrekontuari zuzenketak egin dizkiogu Gipuzkoako nekazariei eta abeltzainei  diruz-laguntzeko, hain zuzen ere, 500.000 euroko zuzenketak”.

Azkenik, Olano Donostiak zein Gipuzkoako udalerriek dituzten proiektu estrategikoetaz mintzatu da: “Bai Donostiak, bai Gipuzkoako gainerako udalerriek baztertu ezin ditugun proiektu estrategikoak dituzte. Horrenbestez, zuzenketak egin ditugu, alde batetik, Donostiako proiektuei milioi bat euro emateko – bereziki, Karlos lehena kentzeko eta Donostiako Nazioartzeko Zinemaldia diruz-laguntzeko – eta, bestetik, beste milioi bat euro emateko Gipuzkoako gainerako udalerriek dituzten proiektu estrategikoak bultzatzeko”.