29 de enero de 2014

EAJ-PNV-REN USTEZ, LARRIA DA BILDUK EUROPAR BATASUNARI INFORMATU EZ IZANA HONDAKINEN PLANGINTZA EZ DELA BETETZEN ARI



Batzarkide-talde jeltzaleak eskatu du Iñaki Errazkin foru diputatua Ingurumeneko eta Lurralde Antolaketako batzordean parte-hartzeko eta, bertan, azaltzeko Foru Aldundiaren eta Europar Batasunaren Batzordearen arteko harremana azkeneko hiru urteetan.



Bilduren aginteko Foru Aldundiak Europar Batasunaren Batzordetik berri txarra jaso zuen atzo. Izan ere, Europar Batasunak ikertuko ditu Bilduren aldaketak hondakinak kudeatzeko plangintzari, hain zuzen ere, aldaketa horiek Europako zuzentarauekin betetzen duten ala ez aztertzeko.

Horren harira, EAJ-PNVren batzarkide Xabier Ezeizabarrenak honakoa esan du: “Berriro ere agerian gelditu da Bildu ez dela gardena izan hondakinen kudeaketan. Izan ere, Ingurumeneko foru diputatu Iñaki Errazkinek aipatu du Europar Batasunaren Batzordeak ezagutzen zuela Bilduren aginteko Foru Aldundiaren hondakinen gaineko kudeaketa eta, gainera, kudeaketa horrekin bat egiten zuela. Baina aitzitik, orain, agerian gelditu da foru diputatua gezurretan ari zela, izan ere, Europar Batasunaren Ingurumeneko komisario Janez Potocnik-ek atzo esan zuen Foru Aldundiak ez diola aditzera eman Europar Batasunaren Batzordeari Gipuzkoako hondakinak kudeatzeko plangintzari aldaketarik egin dionik”.

Hortaz, Ezeizabarrenak aditzera eman du, EAJ-PNVren batzarkide taldeak eskatu duela Ingurumeneko eta Lurralde Antolaketako foru diputatu Iñaki Errazkin batzordean parte-hartzeko eta, bertan, zehazteko Foru Aldundiaren eta Europar Batasunaren Batzordearen arteko harremana azkeneko hiru urteetan.   

Era berean, EAJ-PNVren batzarkideak gogorarazi du, Hondakinak kudeatzeko Europar Batasunaren zuzentarauaren 4.artikuluan zehazten direla legegintzaren araberako hondakin moten lehentasunak eta prebentzio politika eta hondakinen kudeaketa. Lehentasun horien arabera, lehenik, prebentzioa dago; bigarrenik, hondakinak berriro erabiltzea; hirugarrenik, birziklatzea; laugarrenik, beste balorizazio motak, esaterako, balorizazio energetikoa; eta, azkenik, eliminazioa. Hau da, zuzentarauaren arabera, balorizazio energetikoa da egokiena hondakinak tratatzeko, hain zuzen ere, prebenitu, berriro erabili eta birziklatu ezin diren hondakinak tratatzeko, eta betiere, hondakinak zabortegietara eramatea baino egokiagoa. Beraz, zabortegia, hain zuzen ere, Bilduren apustua, okerragoa da ingurumenaren ikuspegitik eta, ondorioz, hondakinak tratatzeko azkeneko aukera izan behar du”. Hortaz, Xabier Ezeizabarrenak azpimarratu du, egungo Foru Arauak Europar Batasunaren zuzentaraua betetzen duela eta, hori, ezker abertzaleak badakiela, nahiz eta alderdikeriaz baliatzen den kontrakoa esateko.

Halaber, Europako Inbertsio Bankuak (BEI) 2011n kreditua eman zion Gipuzkoari, hain zuzen ere, 195milioi euroko kreditua 7/2008 Foru Arauan aurreikusitako azpiegiturak finantzatzeko. Horri buruz, Ezeizabarrenak honakoa esan du: “BEI-k kreditua eman izanak esan nahi du, Europar Batasunak indarrean dagoen Foru Arauaren alde egiten duela, izan ere, Europako zuzentaraua betetzen du. Horregatik, Bilduk Europar Batasuneko Batzordeari bakarrik hitzez informatu izana BEIren kredituaren egoerari buruz, agerian uzten du Bilduk erakundeei errespetua galdu diela, bai Gipuzkoako erakundeei, bai Europar Batasunaren erakundeei”.

Gainera, jeltzaleen batzarkideak ez du oso argi zer aztertuko duen Europar Batasunaren Batzordeak: “Ez dakigu Europar Batasunaren Batzordeak indarrean dagoen Hondakinak kudeatzeko plangintzaren gaineko ikerketa egingo duen – gogoan izan, BEIk kreditua eman ziola plangintza horri, hain zuzen ere, ezker abertzaleak behin eta berriro betetzen ez duen plangintzari – edo Bilduren asmoen gaineko ikerketa egin duen – gogoan izan, Bildurenak asmoak direla, izan ere, ez du dokumenturik Batzar Nagusietan erregistratu –. Dena dela, ezer asko dago ikertzeko bi kasuetan, alde batetik, lehenengo kasuan, Bilduk behin eta berriro ez duelako betebeharrekoa bete; eta, bestetik, bigarren kasuan, pentsatu gabeko plangintza delako”.

Azkenik, Xabier Ezeizabarrenak segidakoa salatu du: “Laster beteko ditu ezker abertzaleak hiru urte Foru Aldundiaren agintean, eta oraindik ez du egin BEIk finantzatutako instalazio bat bera ere. Era berean, Gipuzkoako hiru zabortegiak gainezka egiteko zorian daude eta Bilduk ez du plangintzarik 2014an zabortegi horiek ixteko. Hori dela eta, Ingurumeneko foru diputatu Iñaki Errazkinik eskatu diogu, azaltzeko zer dela eta atzerriko foroetan azaltzen duen Gipuzkoan betetzen ari ez dena”.

No hay comentarios:

Publicar un comentario