Batzarkide-talde jeltzalearen bozeramaileak esan du,
Bilduren aginteko Foru Aldundiak ezingo duela aldez aurretik pentsatu gabeko
erabaki gehiago hartu.
EAJ-PNV batzarkide taldeak proposatutako Foru Arauak,
hain zuzen ere, Ekonomia Sustatzeko Foru Arauak, azken onarpena jaso du gaur
goizean Gipuzkoako Batzar Nagusietan. Horrenbestez, Bilduren aginteko foru
gobernua behartuta egongo da Gipuzkoan ekonomia sustatzeko plangintzak egitera.
Behin Foru Araua onartuta, batzarkide-talde jeltzalearen bozeramaile Markel
Olanok honakoa esan du: “Foru Arauari esker Bilduren aginteko Foru Aldundiak
ezingo du aldez aurretik pentsatu gabeko erabaki gehiago hartu”.
Horren harira, Olanok azpimarratu du, gaurtik aurrera
foru gobernuak ekonomia sustatzeko plangintza egin eta onartu beharko duela
Gipuzkoako Batzar Nagusietan eta, horretarako, gai bakarreko osoko bilkura egin
beharko dela, eta, beti, aurrekontuen proiektua eztabaidatu eta onartu baino
lehen.
Era berean, EAJ-PNVren batzarkide-taldearen bozeramailea
pozik dago Ekonomia Sustatzeko Foru Araua onartu delako eta honakoa esan
du:”Foru arauak gauzak asko aldatuko ditu, izan ere Foru Aldundiari esango dio
nola egin behar dituen Gipuzkoako ekonomia sustatzeko planak”.
Hortaz, Markel Olanok foru arauaren bi artikulu
azpimarratu ditu: “19. eta 20. artikuluek dute garrantzia. Izan ere, lehenak
ezartzen du Foru Aldundiak hurrengo urteko ekonomia sustatzeko plana egin behar
duela abenduaren 15a baino lehen; eta bigarrenak dio ekonomia sustatzeko plana
Batzar Nagusietan eztabaidatu eta onartu beharko dela eta, beti, aurrekontuen
proiektua eztabaidatu eta onartu baino lehen”.
Olanok, halaber, segidakoa gogorarazi du: “Legealdiaren
hasieratik EAJ-PNVk eskatu du krisiari aurre egiteko eta ekonomia sustatzeko
plangintzak egiteko, hain zuzen ere, legealdi osorako plangintzak. Baina
aitzitik, Bilduren aginteko foru gobernuak behin eta berriro ezetz esan du eta,
ondorioz, Gipuzkoako enpresak ez dute Foru Aldundiaren babesa jaso eta oso
bakarrik sentitu dira. Eta hori onartezina da. Hori dela eta, behin ikusita
Batzar Nagusietan aukera guztiak agortu genituela, foru araua egitera behartuta
ikusi genuen gure burua, hain zuzen ere, Bildu Gipuzkoan ekonomia sustatzeko
plangintzak egitera behartzeko foru araua. Eta, horretarako, Gipuzkoako
gizartearen, politikaren eta ekonomiaren hainbat eragilerekin elkarlanean aritu
gara”.
Gainera, EAJ-PNVren batzarkideak Bilduri leporatu dio,
gipuzkoarrak kaltetu izana, izan ere, behin eta berriro uko egin dio krisiari
aurre egiteko plangintzak egiteari: “Eta Bilduren jarrera horren ondorioz,
aurrekontuak negoziatzeko prozesua beti berdina izan da: Bilduk aldez aurretik
pentsatu gabeko erabakiak hartu ditu eta ez du plangintzarik egin, eta, beraz,
oposizioak konpondu behar izan ditu Bilduren hutsune horiek eta, horretarako,
hainbat aurrekontu-sail egin ditu. Hortaz, Bilduren ezetza eta aldez aurretik
pentsatu gabeko erabakiak izan dira EAJ-PNVren arrazoiak Ekonomia Sustatzeko
Foru Araua egiteko, hain zuzen ere, gaur Gipuzkoako Batzar Nagusietan onartu
den Foru Araua”.
Azkenik, Markel Olanok Martin Garitano diputatu nagusiari
honakoa eskatu dio: “lehenik, errespetatzeko eta betetzeko onartutako foru
araua; bigarrenik, ez saiatzeko eztabaida besteratzen; hirugarrenik, bere gain
ez hartzeko oposizioak egindako ekimenak zein plangintzak; eta laugarrenik, ez
leporatzeko egoeraren ardura Eusko Jaurlaritzari, izan ere Foru Aldundiak
ekonomia sustatzeko eskumenak ditu”. Hortaz, Olanoren ustez, agerian gelditu da
Gipuzkoan bi eredu daudela: alde batetik, EAJ-PNVren eredua, hain zuzen ere, industriaren aldeko
eredua; eta bestetik, Bilduren eredua, Gipuzkoako ekonomiatik eta industriatik
urrun dagoena eta, ondorioz, Bilduk ez du gaitasunik Gipuzkoan ekonomia
suspertzeko liderra izateko”.
No hay comentarios:
Publicar un comentario