17 de octubre de 2014

EAJ-PNV-K SALATU DU KABIA-K ARRISKUAN JARTZEN DITUELA EGUN GIPUZKOAKO GIZARTE POLITIKEN KUDEATZAILE IRABAZI ASMORIK GABEKO ELKARTEAK


Batzarkide-talde jeltzalearen bozeramaile, Markel Olanok ezker abertzaleari leporatu dio, Kabia martxan jartzeko bakarrik irizpide politikoak – muturreko ezkerraren irizpide politikoak – kontuan hartu izana, eta ez, ordea, zerbitzuaren kalitatea.  




Gipuzkoako EAJ-PNVk gaur goizean hasi ditu bilerak Gipuzkoako hirugarren sektoreko elkarteekin – gehienak irabazi asmorik gabeko elkarteak –, hain zuzen ere, Gipuzkoan gizarte politikak kudeatzen diputen elkarteekin. Bileren helburua honakoa da: jeltzaleen kezka adieraztea Kabia Organismo Autonomoaren martxan jartzea dela-eta, eta, era berean, elkarteen iritzia ezagutzea. Gaur, jeltzaleen ordezkariak – EAJ-PNVren batzarkide-taldearen bozeramaile Markel Olano, batzarkide jeltzale Eider Mendoza eta GBBko burukide Maite Peña – Atzegi eta Gureak elkarteekin izan dira eta, gainera, aditzera eman dute, hurrengo astean Gautena, Aspace, Gurutze Gorria, Caritas eta Agifes elkarteekin bilerak egingo dituztela.

Atzegiko ordezkariekin bilera izan aurretik, EAJ-PNVren batzarkide-taldearen bozeramaileak komunikabideei adierazpenak egin dizkie. Bertan, Markel Olanok salatu du, Kabia martxan jartzeko Bildu eta PSE alderdien arteko akordioa oso albiste txarra dela, izan ere, irabazi asmorik gabeko elkarteak arriskuan jartzen ditu, hain zuzen ere, Gipuzkoan gizarte politikak kudeatzen dituzten irabazi asmorik gabeko elkarteak. Horren harira, Olanok honakoa esan du: “Arriskuan dago Gipuzkoan gizarte politikak kudeatzeko egungo eredu egokia. Izan ere, Foru Aldundiak dagoeneko erabaki du gizarte politiken kudeaketa publiko zuzena egitea”.

Era berean, EAJ-PNVren batzarkide-taldearen bozeramaileak segidakoa adierazi du: “Bilduk zahar-egoitzen kudeaketa hartzeko eskualdatzea egiteko pentsatutako foru araua erabili du, gizarte-zerbitzuen kudeaketan iraultza egiteko. Jeltzaleok ados gaude zahar egoitzen kudeaketaren eskualdatzearekin, baina Foru Aldundiak ez du bakarrik hori egin nahi, baizik eta egun gizarte politikak kudeatzeko eredugarria den eredua baztertu nahi du eta kudeaketa guztia publikoa eta zuzena egin nahi du. Eta hori guztia, nahiz eta hirugarren sektoreak – gehienbat irabazi asmorik gabeko elkarteak – ezinhobe kudeatu dituen gizarte politikak”.

Hortaz, Markel Olanok honakoa salatu du: “Kabiak okerrago kudeatuko ditu gizarte politikak, izan ere, irabazi asmorik gabeko elkarteei erasotzen die eta lanik gabe utziko ditu”. Gainera, Olanok adierazi du, Bilduren aginteko Foru Aldundiak PSEren babesarekin proposatutako eredua %50 garestiagoa dela, ez dela eraginkorra, eta herritarrentzako ere garestiagoa dela. Izan ere, zenbat eta garestiagoa izan egoitza bateko lekua, orduan eta diru gehiago ordaindu beharko du erabiltzaileak.

Azkenik, EAJ-PNVren batzarkide taldearen eledunak Bilduri segidakoak leporatu dizkio: “Lehenik, zahar-egoitzen eskualdatzea erabili izana egungo Gipuzkoako gizarte politiken kudeaketaren aurka egiteko; eta bigarrenik, Kabia martxan jartzeko bakarrik irizpide politikoak – muturreko ezkerraren irizpide politikoak – kontuan hartu izana, eta ez, ordea, zerbitzuaren kalitatea”.

No hay comentarios:

Publicar un comentario