Xabier Ezeizabarrena batzarkide jeltzalearn ustez, “Foru Aldundiak agerian utzi du Batzar
Nagusien gehienaren erabakia ez duela errespetatuko”.
Gipuzkoako Foru Aldundiaren
Hondakinen Planaren aurkezpenean polemika izan da nagusi. Batzar Nagusietan
hainbat aditu agertu dira, bere iritziak azaltzeko eta taldeen galderei
erantzuteko. EAJ-PNVren hautetsi Xabier Ezeizabarrenak honakoa esan du:
“Aldundiak kale egin du. Hots, aurkezpena porrot handia izan da eta, gainera,
herritarrei iruzur egin diete”.
Era berean, jeltzaleak segidakoa
azpimarratu du: “Uste genuen Foru Aldundiak hondakinen eztabaida ganbera
honetara ekarriko zuela, izan ere, plangintza arloan eskumena du. Baina, Juan
Carlos Alduntzin foru diputatuaren hitzak entzun eta gero, agerian utzi du
Batzar Nagusien gehiengo demokratikoaren borondatea ez duela errespetatuko”.
Alduntzinek berak esan du
aurkeztutako planak egungo foru arauaren aldaketa ez duela behar. Xabier
Ezeizabarrenaren aburuz, “herritarroi adarra jotzen ari zaigu; hau da,
estrategia aldaketari buruz hitz egiten du, egungo hondakinen plangintza aldatu
nahi du, baina ez du nahi Batzar Nagusiek eztabaidatzea ez bozkatzea, nahiz eta
horien eskumena den”.
Halaber, Ezeizabarrenak
zabortegiak izan ditu hizpide: “Foru Aldundiak eufemismoak erabili ditu
zabortegia hitza ekiditeko, besteak beste: hondakin
egonkortuen fardelen depositatze kontrolatua, espazio degradatuak leheneratu
eta berreskuratzeko. Hots, zabortegi berriak irekitzeari buruz ari dira
eta, beraz, zero zabor politika gezur hutsa da eta Bilduren apustua agerian
uzten du: zabortegi batzuk itxi beste batzuk zabaltzeko”. Ildo beretik,
jeltzaleak honakoa galdetu du: “Zer gertatuko da ireki nahi dituzten
zabortegiak betetzen direnean? Gaur Bilduk proposatu diguna aurrera begirako
ihesa da”.
Azkenik, EAJ-PNVren batzarkideak
Foru Aldundiari eskatu dio, “dokumentua Batzar Nagusietara ekartzeko, bertan
eztabaidatzeko nahiz bozkatzeko, eta gehiengoak erabakitzen duena
errespetatzeko”.
No hay comentarios:
Publicar un comentario