MARKEL OLANO: “MARTIN GARITANOK EZ DU GIPUZKOA SARETZEN EGITASMOARI BURUZ EMANDAKO HITZA BETE”.

EAJ-PNV batzarkide taldearen bozeramailearen ustez, ekonomiaren egoera oso larria da eta egoerari aurre egiteko Bilduren aginteko Foru Aldundiaren tresna bakarra – hain zuzen ere, Gipuzkoa Saretzen egitasmoa – oraindik azterketa fasean dago.

Batzar Nagusietako gaurko osoko bilkuraren azkeneko gaian, EAJ-PNV batzarkide taldearen bozeramaile Markel Olanok Martin Garitano diputatu nagusiari honakoa galdetu dio: “Noiz eta nola gauzatzeko asmoa du Foru Aldundiak Gipuzkoa Saretzen egitasmoa?”.

Horren harira, Olanok gogoratu du, 2011n Martin Garitano diputatu nagusiak Gipuzkoa Saretzen ekimena abian jarriko zuela esan zuenetik urte eta erdi pasa dela eta, oraindik, Martin Garitano ez dela gai izan ekimen horren proiektu zehatzak aipatzeko. Gainera, 2012ko azaroan Gipuzkoa Saretzen egitasmoari buruzko plangintza zehatza aurkeztuko zuela esan zuen, baina oraindik ez du hitza bete.

Era berean, Olanok Garitanori egotzi dio krisiari aurre egiteko plangintzarik egin gabe jarraitzen duela eta, hori, Gipuzkoarentzat oso larria dela. Izan ere, Gipuzkoako industria – hain zuzen ere, gure ekonomiaren eta ongizatearen ardatza – kinka larrian dago eta, gainera, Gipuzkoan 50.000 langabetu baino gehiago daude. Beraz, Diputatu Nagusiak ez du hitza bete, eta, ondorioz, Gipuzkoak atzera egiten jarraituko du eta, hori, onartezina da”.

Halaber, EAJ-PNV batzarkide taldearen bozeramailearen iritziz, legealdiaren erdia igaro da eta Bilduren aginteko Foru Aldundiak ez du ezer egin. Bakarrik, zuzendaritza bat sortu du, baina ez du horretarako ez aurrekonturik, ez plangintzarik egin.