15 de enero de 2014

EAJ-PNV-REN USTEZ, ZERGA-ERREFORMA KRISIARI AURRE EGITEKO TRESNA OSO EGOKIA DA



Batzarkide-talde jeltzalearen bozeramaile Markel Olanok gogorarazi du, oraindik, egoera oso larria dela eta, beraz, zerga-erreforma da Foru Aldundiarentzako tresnarik egokiena ekonomiaren garapena sustatzeko eta, ondorioz, krisiari aurre egiteko. 



Gipuzkoako Batzar Nagusiek EAJ-PNV, PSE eta PP alderdien zerga-erreforma onartu dute gaur goizeko osoko bilkuran. Hiru alderdiek erreformaren alde egin dute eta Bilduk eta Aralarrek, ordea, kontra. EAJ-PNVren batzarkide taldearen bozeramaile Markel Olanoren ustez, zerga-erreforma krisiari aurre egiteko tresna oso egokia da. Horren harira, Olanok honakoa azaldu du: “Euskadin zergak bateratzea lortu dugu eta hori oso garrantzitsua da. Are gehiago: zergak bateratu ditugu baina lurralde bakoitzak bere berezitasunak mantenduko ditu. Hori dela eta, alde batetik, enpresen lehiakortasuna bermatuko da eta, bestetik, zergak bateratuak ez izateak eragingo dituen arazo politikoak ekidin egingo dira”.

Era berean, Olanoren ustez, zergen bateratzea ekarpen oso garrantzitsua da eta Euskal Autonomia Erkidegoan babes politiko handi du. Eta, babes handi horren ondorioz, zerga-sistemak gizarte- eta ekonomia-arloak egonkortzen ditu. Horiek horrela, EAJ-PNVren batzarkide-taldearen bozeramaileak segidakoa azpimarratu du: “Gainera, zerga-erreforma errealitatera egokitzen da: egun, egoerak oso larria izaten jarraitzen du eta, beraz, zerga-erreforma da Foru Aldundiarentzako tresnarik egokiena ekonomiaren garapena sustatzeko eta, ondorioz, krisiari aurre egiteko”.

Halaber, Markel Olanok kenkarien garrantzia azpimarratu du: “Zerga-erreforman kenkariak erabiltzen dira lehiakortasuna indartzeko eta bermatzeko. Besteak beste segidako kenkariak aurreikusten dira: makina berriak erosteko, ingurumena babesteko, Ikerketa+Garapena+Berrikuntza arloan inbertsioak egiteko, enplegua sustatzeko eta mantentzeko, kapitalizazioa indartzeko eta enpresa txiki berrien sorrera bultzatzeko. Arlo horietan guztietan daude kenkariak. Beraz, ekarpen garrantzitsua egin diogu bai enpleguari, bai enpresei”.

Azkenik, Olanok salatu du, Ogasun eta Finantzetako foru diputatu Helena Francoren jarrera: “Zerga-erreformaren irakurketa apokaliptikoa eta faltsua egin du. Izan ere, bere asmoa bakarrik dirua biltzea da. Eta dirua biltzeko etsairik nagusienak bi dira: krisia eta langabezia, hain zuzen ere, zerga-erreformarekin indartu nahi diren arloak. Eta irakurketa hori egiteko, Helena Francoren hitzak oso larriak izan dira, izan ere, jarrera alderdikoia izan du eta, ondorioz, Ogasun eta Finantzetako departamentuaren ospea kaltetu du”.

No hay comentarios:

Publicar un comentario