19 de abril de 2012

MARKEL OLANO: “BILDUK EZ DU GIPUZKOAKO EKONOMIA SUSTATZEKO NEURRIRIK PROPOSATU”.

EAJ-PNV batzarkide taldearen bozeramailearen ustez, “aldundiaren ardura bakarra dirua biltzea da, ez ordea, lurraldeko ekonomia sustatzeko neurriak ezartzea”.

Martin Garitano diputatu nagusia Gipuzkoako Batzar Nagusien aurrean agertu da, egoera kritikoan eta desagertzeko arriskuan dauden enpresei laguntzeko zer nolako irizpideak jarraituko dituen azaltzeko. EAJ-PNV batzarkide taldearen bozeramaile Markel Olanoren ustez, “ekonomia sustatzeko, aberastasuna sortzeko eta lanpostuak sortzeko politika martxan jarri behar da”.

Ildo beretik, Olanok esan duenez, “Gipuzkoa lurralde lehiakorra izateko eta inbertsio berriak martxan jartzeko ideia eta politika falta dago”. Honenbestez, EAJ-PNVren bozeramailearen iritziz, “Foru Aldundiak ez du tresna berririk sortu ekonomia- zein finantza-egoera larrian dauden enpresei modu egokian laguntzeko. Kasu askotan Berrikuntza departamentuak aurretik bultzatutako politikak aurrera eramaten dituzte”.

Era berean, Olanok honakoa azpimarratu du: “Ekonomiaren sustapena ez dago aldundiaren lehentasunen artean”. Ildo beretik, jeltzaleen bozeramailearen iritziz, “Foru Aldundiak ez du borondaterik kinka larrian dauden enpresei laguntzeko”, eta diputatu nagusiari segidakoa eskatu dio: “Zerga-politikaren bitartez ekonomia-jardueraren garapena bultzatzeko; izan ere, lurraldeko enpresei laguntzeko modurik egokiena da”.

Halaber, hona hemen Markel Olanoren hitzak: “Aldundiaren ardura bakarra dirua biltzea da, ez ordea, lurraldeko ekonomia sustatzeko, negozio berriak sortzeko, I+G+B-ren alde egiteko eta enpresen itxiera ekiditeko neurriak hartzea”. Azkenik, Olanoren aburuz, “aldundiak araudia soilik du buruan eta, ondorioz, bere xedea dirua biltzea da eta ez, ordea, Gipuzkoako ekonomia-jardueraren eragileei, hau da, lurraldeko enpresei laguntzea”.

No hay comentarios:

Publicar un comentario