MARKEL OLANO: “BILDU-K ERABAKI HAU HARTZERA BEHARTU GAITU”.

EAJ-PNV batzarkide taldearen bozeramailearen iritziz, “Alduntzin diputatuaren aurkako zentsura-mozioaren helburua honakoa da: Bilduk jarrera aldatzea, Gipuzkoako hondakinen gaineko liskarra amaitzea eta elkarrekin ados jartzeko bideak aurkitzea”.

Gipuzkoako Batzar Nagusietan Juan Carlos Alduntzin Ingurumeneko eta Lurralde Antolaketako foru diputatuaren aurkako zentsura-mozioa erregistratu ondoren, jeltzaleen batzarkide taldearen bozeramaile Markel Olanoren ustez, “gaurkoa egun gogorra da, izan ere, hartutako neurria oso garrantzitsua da; are gehiago, ez du aurrekaririk”. Olanoren aburuz, “Bilduren aginteko Foru Aldundiari balio politikoa kendu diogu”.

Ildo beretik, jeltzaleen eledunak honakoa esan du: “Bilduk Gipuzkoa inposizioaren mende du hondakinen kudeaketaren arloan eta, ondorioz, erantzun egin diogu, inposizio jarrera hori baztertzeko, bai Batzar Nagusietan bai gehiengoaz baliatuta Gipuzkoako hainbat herritan”.

Era berean, Markel Olanok demokraziaren ikuspegitik hartutako erabakia arrazoitu du: “Bilduk Batzar Nagusiei kendu die Gipuzkoako hondakinen kudeaketaren plangintza egiteko gaitasuna zein legitimitatea”. Horrenbestez, Olanok segidakoa azpimarratu du: “Demokrazia-iruzur baten aurrean gaude; izan ere, Bilduk plangintza erabat aldatu nahi du Batzar Nagusietan eztabaidatu eta bozkatu gabe, nahiz eta Batzar Nagusiek beraiek eskumena duten”.  

Azkenik, EAJ-PNVren bozeramaileak neurriaren garrantziaz hitz egin du: “Neurria muturrekoa da, baina Bilduk berak behartu gaitu erabaki hori hartzera”. Hortaz, Markel Olanoren iritziz, “Alduntzin diputatuaren aurkako zentsura-mozioaren helburua honakoa da: Bilduk jarrera aldatzea, Gipuzkoako hondakinen gaineko liskarra amaitzea eta elkarrekin ados jartzeko bideak aurkitzea”.