EAJ-PNV-REN USTEZ, LARRAITZ UGARTEK GIPUZKOAKO BIDESARIAK IGOTZEKO PLANA EZKUTATZEN DU.

Joseba Antxustegi jeltzalearen iritziz, “oso larria da Bide-azpiegituretako foru diputatuak plangintza teknikoa izatea bai bidesari berriak ezartzeko, bai egungo bidesarien tarifak igotzeko, bai gipuzkoarroi zerga berria ezartzeko, eta Batzar Nagusietan aurkeztu nahi ez izatea”. 

Gipuzkoako Batzar Nagusietako Batzorde Iraunkorrak bilera egin du eta, bertan, Ander Rodriguez Gizarte Politikako foru diputatua eta Larraitz Ugarte Mugikortasun eta Bide-azpiegituretako foru diputatuak azalpenak eman dituzte. Larraitz Ugarteren agerraldian, Joseba Antxustegi jeltzaleak honakoa eskatu dio: “Tarifa-sistemaren gaineko plangintza orokorra egiteko eta zatikako neurriak egiteari uzteko, izan ere departamentuaren plangintza ezaren ondorioa dira”.

Era berean, hona Antxustegiren hitzak: “Ez da egia talde txostengilean Foru Aldundiari bere proposamenak aurkezteko aukerarik eman ez zaionik. Diputazioak neurri zehatzak aurkezteko aukera izan du, baina ez du egin eta soilik neurrik populistak prentsari helaraztea erabaki du”. Hori dela eta,  Ugarte foru diputatuari segidakoa eskatu dio: “Lehenik, ez esateko neurriak aurkeztu ezin izan dituenik; ondoren, talde txostengilearen kideei errua ez botatzeko; eta, azkenik, gaiari orokorrean heltzeko, izan ere, proposamenik izan ezean ehundaka kamioik lurraldea zeharkatzen jarraituko dute euro bat bera ere ordaindu gabe eta, beraz, errepideen mantentze-lanak gipuzkoarron gain jarraituko du”.

Halaber, EAJ-PNVren hautetsiak gogoratu duenez, “lehengo legealdiko errepideak finantziatzeko sistemari buruz eztabaidatzeko talde txostengileak neurri zehatzak hartu zituen eta, hainbat, martxan daude. Hala ere, egun, Foru Aldundiak bere proposamenak gehitu ordez, martxan dauden neurriak gelditu ditu eta egoeraren araberako neurriak hartzen hasi da, besteak beste: KPIren igoera, bidesarien igoera udan, eta gehienez 25 euroko kuota”.

Bidegiren egoerari buruz, Joseba Antxustegiren iritziz, “ez dirudi egoera hain larria denik. Foru diputatuak argi utzi du Bidegik herritarrei laguntzeko neurriak har ditzakeela; nahiz eta egoera larria dela esan nahi izan zaien alarma pizteko helburuarekin”. 

Horregatik guztiagatik, Antxustegik foru diputatuari honakoa eskatu dio: “Ausardia proposamena aurkezteko. Diputatua zerbait ezkutatzen ari da; izan ere, proposamen tekinkoa ba omen du, baina ez die aurkeztu ez taldeei ez herritarrei. Hau da, demokrazia-heldutasun falta erakutsi du. Oso larria da Bide-azpiegituretako foru diputatuak plangintza teknikoa izatea bai bidesari berriak ezartzeko, bai egungo bidesarien tarifak igotzeko, bai gipuzkoarroi zerga berria ezartzeko, eta Batzar Nagusietan aurkeztu nahi ez izatea”.

Ardura Gizarte Politikako murrizketengatik

Bestalde, Eider Mendoza batzarkide jeltzalearen iritziz, “asko kezkatzen gaituzte Espainiako Gobernuak Gizarte Politikan iragarritako murrizketak. Atzerapausoa dira y pertsona asko baztertuko dituzte, bereziki emakumeak. Bereziki, haiek hartzen dute bere gain mendekotasuna duten pertsonen zaintza eta, aurreikusita dagoenez, lan hori egiteagatik Gizarte Segurantzako kotizazioa kenduko diete. Hori hankasartze larria da”.

Ildo beretik, Mendozaren ustez, “Gizarte Politikako inbertsioak mantentzea lehenetsi behar da; beraz, urduritasuna sortzen digu ez jakiteak arlo horretan murrizketa gehiago egongo diren ala ez”. Hortaz, EAJ-PNVren batzarkideak honakoa gogoratu du: “Euskadin gizarte-zerbitzuetako berezko sistema eraiki dugu eta, hori da, hain juxtu ere, desegin nahi dutena”.

Azkenik, jeltzaleen hautetsiak honakoa azpimarratu du: “Beharrezkoa da ekonomia sustatzea Gizarte politikako inbertsioak mantentzeko. Beraz, zer utziko du Foru Aldundiak alde batera prest dituen neurriak martxan jartzeko? Nondik kenduko duzue Espainiako Gobernuaren murrizketei aurre egiteko?”. Horrenbestez, Eider Mendozak Foru Aldundiari segidakoa eskatu dio: “Baldin eta ogasun-kanpainan espero zena baino 17,6milioi euro bildu badira, diru-sarrera horiek ekonomia sustatzeko, krisiaren aurkako planak egiteko eta gizarte politiken beharretarako izateko”.