EAJ-PNV-REN USTEZ, ONDAREEN GAINEKO ZERGA ALDATZEKO BILDUREN PROPOSAMENA DEMAGOGIA HUTSA DA

Jeltzaleen batzarkide taldearen bozeramaile Markel Olanoren iritziz, “Ondareen gaineko Zergak bermatu behar du zerga-sistemaren berdintasuna eta honako irizpidea jarraitu behar du: nolako ondarea halako zerga”.  

Gipuzkoako zerga-sisteman Ondareen gaineko Zerga berriro ezartzeko prozesuak eta eztabaidak aurrera darraite Gipuzkoako Batzar Nagusietan. Markel Olano EAJ-PNV batzarkide taldearen bozeramailearen aburuz, “Ondareen gaineko Zergak bermatu behar ditu zerga-sistemaren berdintasuna, zerga bera progresiboa izatea eta justua izatea. Hau da, ezin du produkzio-jardueren bitarteko aberastasunaren sorrera zigortu”.

Era berean, Olanok honakoa azpimarratu du: “Zerga aztertu behar da eta, horretarako, Bizkaiko eta Arabako Foru Aldundiekin elkarlanean egin behar dugu, gutxieneko salbuespenak berdintzeko eta, ondorioz, zerga bateratua izateko eta Euskadiko hiru Lurralde Historikoen arteko desoreka ekiditeko”. 

Halaber, jeltzaleen batzarkide taldearen bozeramaileak kritikatu du Bilduren proposamena Ondareeen gaineko Zergaren izena aldatzeko. Koalizio abertzaleak segidako izena jarri dio: Aberastasunaren eta Ondasun handien gaineko Zerga. Markel Olanoren iritziz, “Ondareen gaineko Zergari soilik izena aldatu diote, izan ere, proposatu dizkioten aldaketak ez dira hain handiak eta, beraz, ezin da esan beste zerga bat denik”.  

Ildo beretik, Olanok esan du, Ondareen gaineko Zergaren izen aldaketa “demagogia hutsa dela” eta, horrenbestez, honakoa gogoratu du: “Euskal Autonomia Erkidegoko  Lurralde Hostorikoek zerga bateratua izan dezaten, Ondareen gaineko Zerga deitzen jarraituko zaio; izan ere, zergaren araudian ez dago aldaketa garrantzitsurik”.

EAJ-PNV batzarkide taldeak aurkeztutako zuzenketei buruz, jeltzaleen eledunak segidakoa azpimarratu du: “Helburua Ondareen gaineko Zergaren eguneraketa egitea da; betiere, berdintasun eta eraginkortasun eza zein akatsak konponduz, zerga ahalik eta egokien banatzeko zergadunen artean. Hori dela eta, Ondareen gaineko Zergak honako irizpidea jarraitu beharko du: nolako ondarea halako zerga. Baina aitzitik, Gipuzkoako Foru Aldundiak aurkeztutako foru arau proposamenak ez du hori betetzen”.  

Amaitzeko, Markel Olanoren aburuz, “neurriak hartu behar dira Ondareen gaineko Zergaren zerga-oinarria handitzeko eta, hori horrela izanik, zergadunek ezingo dute zerga hori ekidin eta, gainera, egoki zergapetuko dira kopuru batetik gorako ondasunak”.