EAJ-PNV-K KRISIARI AURRE EGITEKO ZUZENKETAK PROPOSATU DITU GIZARTE POLITIKAK INDARTUZ

Jeltzaleen batzarkide taldearen bozeramaile Markel Olanok azaldu duenez, “91 zatiko zuzenketa proposatu ditugu eta zenbatekoa 24 milioi eurokoa da; izan ere, krisialdiaren seigarren urtea izango da eta enpleguari, prestazioei, pertsonen itxaropenei, pobreziari eta sosegu ezari eragingo die”. 

Joseba Egibarrek eta Markel Olanok prentsaurrekoa egin zuten larunbatean eta, bertan, iragarri zuten Gipuzkoako Foru Aldundiaren aurrekontuari osoko zuzenketarik ez ziotela aurkeztuko. Gaur, berriz, EAJ-PNV batzarkide taldearen bozeramaile Markel Olanok zatiko zuzenketen gaineko zehaztapenak egin ditu: “Krisiari aurre egin nahi diogu gizarte politiken arloan murrizketarik egin gabe. Horretarako, 91 zatiko zuzenketa proposatu ditugu eta zenbatekoa 24 milioi eurokoa da, segidako eskaerak egiteko: krisiari aurre egiteko, gizarte politikak hobetzeko eta hondakinen kudeaketa egiteko”. 

Krisiari aurre egiteko neurriei buruz, Olanok honakoa azaldu du: “Berrikuntza departamentuaren aurrekontua %24 murriztu da eta, horrek, izugarri arduratzen gaitu. Ondorioz, 2013., 2014. eta 2015.urteetan 10 milioi euroko aurreontu-saila emateko konpromisoa proposatu dugu”. Jeltzaleen bozeramaileak zehaztu duenez, “aurrekontu-saila horrek honako egitekoak izango ditu: krisi-egoeran dauden enpresei lagundu, berrikuntza eta nazioartekotze proiektuen alde egin, eta gazte kualifikatuen enplegua sustatu, haiek baitira Gipuzkoaren lehiakortasuna eta garapena etorkizunean bermatu behar dutenak”.

Gizarte politiken gainean, EAJ-PNV batzarkide taldearen eledunak segidakoa azpimarratu du: “Gizarte politiken kudeaketa, orain arte, arlo publikoa eta pribatuaren arteko elkarlanaren bitartez egin da eta eredua izan da hainbat lekutan. Aitzitik, Bilduren aginteko Foru Aldundiak ez du bat egiten ereduarekin eta, ondorioz, aldatu nahi du; nahiz eta ez duen lortu ados jartzea beste alderdi politikoekin edo gizarte-erakundeekin”. Ildo beretik, Markel Olanoren aburuz, “ekonomia-egoera zein den ikusita, atentzioa eman digu Foru Aldundiak gizarte politika departamentuko aurrekontuan bost milioi euroko murrizketa egin izanak. Gure ustez, bi arrazoi horiek gaur arte egindako lana bazterrean uzten dute”.

Horrenbestez, Olanok Foru Aldundiak egindako murrizketak kritikatu ditu: “lehena, gizarte-bazterketa arriskuan dauden taldeentzako zein genero indarkeriaren biktimentzako laguntzak. Bigarrena, Irungo eta Elgoibareko egoitzen eraikuntzarako inbertsio eza. Hirugarrena,  inbertsioetarako atalean Talleres Protegidos Gureak S.A.-rekin sinatutako konpromisoak – enplegurako zentro bereziak eta lana aurkitzeko tailerrak egiteko – bertan behera gelditu izana. Eta azkena,  Gipuzkoan gizarte zerbitzuetako erakunde zein taldeekin elkarlana sustatzeko nahiz hitzarmenak egiteko aurrekontu-sailen murrizketa. Gainera, proposatu dugu egoitzetako leku-kopuruetarako aurrekontu-sailak handitzeko".

Bestalde, hondakinen kudeaketari proposatutako zuzenketei buruz, Gipuzkoako Batzar Nagusietan jeltzaleen bozeramailearen ustez, “2013ko aurrekontu zirriborroan argi gelditu da Foru Aldundiak ez duela beteko hartutako konpromisorik, Gipuzkoan sortutako hondakinen tratamendurako beharrezko azpiegiturak egiteko. Horregatik, zatiko zuzenketa proposatu dugu, Gipuzkoan hondakinen tratamendurako beharrezkoak diren azpiegiturak egiteko eta, bereziki, balorizazio energetikorako errausketa-instalazioa eraikitzeko”.

Era berean, Markel Olanok honakoa gogoratu du: “Hondakinen kudeaketaren gainean Foru Aldundiaren jarrera oztopatzailea da eta, ondorioz, “zuzenketa proposatu dugu, Batzar Nagusien gehiengoak Gipuzkoako Hiri-Hondakinen Kudeaketarako Plangintza Orokorra (PIGRUG) babesten duela irudikatzeko”.

Azkenik, Olanok zehaztu du, EAJ-PNVk dozena zatiko zuzenketa proposatu dituela baserritarren diru-laguntzen murrizketei aurre egiteko eta, gainera, testu artikulatuari beste bederatzi zuzenketa proposatu dizkiola. Hortaz, Markel Olanok segidakoa gogoratu du: “zatiko zuzenketak aurkezteko erabakiaren arrazoia honakoa da: koherenteak eta herriarekin arduratsuak izan nahi dugu eta, beraz, ez ditugu EAEko hiru larraldeetako aurrekontuak oztopatuko; izan ere, Euskadi eta, gure kasuan Gipuzkoa, aurrera egiteko ezinbesteko tresnak dira”.