EAJ-PNV MARTIN GARITANO DIPUTATU NAGUSIARI OHARTU DIO, DIRU BILKETAREKIN SOILIK GIPUZKOAK EZ DIOLA KRISIARI AURRE EGINGO

Jeltzaleen batzarkide taldearen bozeramaile Markel Olanoren iritziz, erakundeen arteko elkarlana inbertsio estrategikoak egiteko orduan da krisiari aurre egiteko bidea  

Martin Garitano diputatu nagusiak eta Helena Franco Ogasuneko foru diputatuak Gipuzkoako Batzar Nagusietan agertu dira, Ajuria-Enean lehendakariarekin eta Bizkaiko eta Arabako diputatu nagusiekin izandako bilerari buruzko azalpenak emateko. EAJ-PNV batzarkide taldearen bozeramaile Markel Olanoren ustez, bilerak argi utzi zuen Eusko Jaurlaritza eta foru aldundien artean harremana dagoela. Beraz, bileran Jaurlaritza eta aldundiak ados jarri ziren eta, hori, oso albiste ona da.

Dena den, Olanok Bilduren aginteko foru aldundiari kritikatu dio, adostasuna ezkutatu nahi izan duela: “Oso larria da erakunde batek gezurra esan izana eta akordioa egon zela ukatu izana. Zorionez, Foru Aldundiak iritzia aldatu du. Hala ere, zergatik dio Bilduk beldurra Eusko Jaurlaritzaren eta foru aldundien arteko adostasunari?”.

Era berean, EAJ-PNVren eledunak azpimarratu du, Bilduren aginteko Foru Aldundiak Batzar Nagusien esku utziko duela defizita malgutzeari buruzko erabakia eta, beraz, zorpetzeko erabakia. Horrenbestez, Markel Olanok honakoa esan du: “Azkenean, Bilduk Batzar Nagusien borondatea errespetatuko du eta legealdian lehenengo aldia izango da. Izan ere, orain arte ez ditu Batzar Nagusiak aintzat hartu, besteak beste segidako gaitan: krisiari aurre egiteko borrokan, hondakinen kudeaketan eta zahar-egoitzen kudeaketan”. 

Olanok, halaber, Foru Aldundia kritikatu du, izan ere bakarrik diru bilketan pentsatzen du: “Egia da zerga-politikan aurrerapausoa egin behar dela, baina diru-bilketarekin soilik Gipuzkoak ez dio krisiari aurre egingo”. Horren harira, jeltzaleen bozeramaileak salatu du, Foru Aldundiak ez duela egin oraindik krisiari aurre egiteko planik eta, hori, oso larria da. Izan ere, diputatu nagusiak berak eta Ogasuneko foru diputatuak azaldu dute Eusko Jaurlaritzarekin eta foru aldundiekin izandako bileran larrialdi plana eskatu zutela ekarpen legeari, kupoari eta zerga-politikari buruz, baina horiek guztiek bakarrik diru-bilketarekin zerikusia dute. Beraz, Markel Olanok Bilduren aginteko Foru Aldundiari honakoa gogoratu dio: “Larrialdi-planak hitzarmen mahaia izan behar du, eta hori da hain zuzen ere, legealdian zehar Foru Aldundiari hainbat aldiz egiteko eskatu dioguna. Baina aitzitik, Bilduk ez ditu aintzat hartu gure eskariak”.  

Azkenik, EAJ-PNV batzarkide taldearen bozeramaileak Martin Garitano diputatu nagusiari eskatu dio, gainerako erakundeei ez eskatzeko berak egin ez dituen ekimenak egiteko – gogoan izan, Garitanok berak esan zuela krisiari aurre egiteko planek ez zutela ezertarako balio – eta, era berean, beste erakundeekin elkarlanean aritzeko inbertsio estrategikoak egiteko, izan ere hori da krisiari aurre egiteko bidea.