EAJ-PNV-REN USTEZ, POZGARRIA DA JAKITEA FORU ALDUNDIAK MUGI TXARTELAREN ERABILTZAILEEI KALTE-ORDAINAK EMANGO DIZKIELA, EZARTZE-PROZESUA KAOS BAT IZAN DELAKO

Joseba Antxustegi jeltzalearen iritziz, Bilduk ez du kritikarik onartzen eta, beraz, ez du aitortu nahi Mugi txartelaren ezartze-prozesua kaos bat izan dela. Horren ordez, begiak itxi egiten ditu, nahiz eta horrek ez duen arazoa konpontzen”. 

Mugiren ezartze-prozesuaren kaosa eta erabiltzaileen kexak Batzar Nagusietara iritsi dira eta, bertan, batzarkide taldeek EAJ-PNVren proposamena eztabaidatu dute. Joseba Antxustegi jeltzaleen batzarkideak honakoa esan du: “Foru Aldundiak ez du aurreikuspenik egin eta ez da gai izan gaia behar den bezala kudeatzeko. Ondorioz, Mugi txartelaren ezartzea kaos bat izan da”. Dena dela, EAJ-PNVren batzarkidearen iritziz, pozgarria da jakitea, Foru Aldundiak Mugi txartelaren erabiltzaileei kalte-ordainak emango dizkiela, txartelak garaiz egin ez dituelako eta, ondorioz, erabiltzaileek txartel arrunta ordaindu behar izan dutelako. 

 Horren harira, Antxustegik segidakoa salatu du: “Bilduren aginteko Foru Aldundiak presa handia izan du tarifa bakarra ezartzeko eta, beraz, ez du zer gertatuko zen jakiteko aurreko azterketarik egin eta, ondorioz, garraio publikoaren erabiltzaileak kaltetu ditu; izan ere, ez da gai izan eskari guztiei erantzuteko eta, gainera, hainbat talde beherapenetatik kanpo utzi ditu”.

Era berean, EAJ-PNVren batzarkideak azpimarratu du, ezartze-prozesuaren kaosa arreta zerbitzura hedatu dela: “Zerbitzua ez da egokia izan; izan ere, arreta zerbitzua emateko telefonoek eta bulegoek gainezka egin dute eta Bilduren aginteko Foru Aldundiak ez dio arazoari behar den bezala aurre egin”.

Bilduk ez du onartu izan nahi EAJ-PNVren batzarkide Joseba Antxustegiren kritika eta, ondorioz, ez da adostasunik egon. Antxustegik berak azaldu duenez, talde guztiek onartu dute Mugi txartelaren ezartze-prozesuan gauza dezente hobetu behar direla eta, beraz, prozesua ez dela egokia izan. Baina aitzitik, Bilduk nahiago du kritikari entzungor egin, Mugiren ezartzea kaos bat izan dela aitortu baino lehen. Beraz, Bilduk begiak itxi ditu eta, horrek, ez du arazoa konpontzen.

Joseba Antxustegik, halaber, honakoa esan du: “Bilduk nahastu egiten ditu txartel bakarra eta tarifa bakarra eta, gainera, bereak ez diren merituak bere gain hartzen ditu. Beraz, Bilduri gogoratu behar diogu Foru Aldundiak Lurraldebus txartel bakarra duela bi legealdi sortu zuela eta, lehengo legealdian Arantxa Tapia Mugikortasuneko foru diputatuak sustatu eta hedatu zuela. Orain, Mugik prozesu hori guztiari amaiera ematen dio eta tarifa bakarra ezartzen du. Hori guztia da, hain zuzen ere, Bilduk ahaztu egin duena”. Horrenbestez, Antxustegik Bilduren aginteko Foru Aldundiari eskatu dio, txartel bakarra eta tarifa bakarra Bilduren aginteko Foru Aldundiaren ekimena direla esateari uzteko, gezurra delako. Are gehiago: “Tarifa bakarra 2012ko urtarrilean indarrean egon behar zuen, baina Bilduk urtebete atzeratu du eta kaos bat izan da, Bilduk bat bateko erabakiak hartu dituelako, eta, ondorioz, herritarrak nahastu eta haserretu dituelako”.  

Azkenik, EAJ-PNVren batzarkideak segidakoa gogoratu du: “Norbaitek garraio publikoaren alde egin badu, hori EAJ-PNV izan da. Izan ere, txartel bakarra egin zuen, tarifa bakarra ezartzeko dena prest utzi zuen eta, gainera, errepideak finantzatzeko talde txostengilean proposatu zuen bidesarien bidez jasotakoaren zati bat garraio publikoa sustatzeko izatea”.