EAJ-PNV-K SALATU DU BILDUK EZ DUELA BORONDATERIK ETA LIDERGORIK IZAN GIPUZKOAN EKONOMIA SUSTATZEKO PLANIK EGITEKO

Batzarkide jeltzale Eider Mendozak Bilduri leportatu dio bakarrik ezker abertzalearen iritzia entzutea eta, ondorioz, gipuzkoar gehienen iritzia baztertu izana.

EAJ-PNVk aurkeztutako Ekonomia Sustatzeko Foru Arauak – hain zuzen ere, Bilduren aginteko foru gobernua krisiari aurre egiteko plangintza egitera behartzeko foru araua -  beste izapide bat gainditu du gaur goizean Gipuzkoako Batzar Nagusietan. Bertan, Berrikuntzako, Landa Garapeneko eta Turismoko batzordean, batzarkide taldeek foru arauari egindako zuzenketak eztabaidatu eta bozkatu dituzte. Bakarrik oposizioko batzarkide taldeek egin dizkiote zuzenketak foru arauari. Bildu eta Aralar taldeek, ordea, ez dute zuzenketarik egin nahi izan, izan ere, hasieratik foru arauaren aurkako jarrera izan dute.

Horiek horrela, batzarkide jeltzale Eider Mendozak honakoa salatu du: “Bilduk ez du borondaterik izan foru arauari ekarpenik egiteko, hain zuzen ere, uneko foru gobernuari zein hurrengo foru gobernuei ekonomia sustatzeko neurriak hartzera behartuko dituen foru arauari”. Horrenbestez, Mendozaren ustez, Bilduk ez du gaia inoiz gidatu, izan ere, ez ditu kontuan hartzen Gipuzkoako benetako beharrak. Eta, horrek, erakusten du Bilduren aginteko foru gobernuaren kudeaketa guztiz geldi dagoela. 

Era berean, EAJ-PNVren batzarkideak honakoa gogorarazi dio Bilduri: “Legealdia hasi zenetik, EAJ-PNVk hainbat ekimen egin ditu Foru Aldundia behartzeko ekonomia sustatzeko planak egitera. Baina aitzitik, Bilduren aginteko foru gobernuak ez ditu eskaerak aintzat hartu, hain zuzen ere, Batzar Nagusien gehiengoaren eskaerak: lehenik, ez zuen bete EAJ-PNVk eskatutako krisiari aurre egiteko plana egitea; bigarrenik, ez zuen eratu Batzar Nagusien gehiengoak eskatutako hitzarmen mahaiaren eratzea; eta, hirugarrenik, Bilduren aginteko Foru Aldundiak aurrekontuetan egin dituen sailak oposizioko taldeekin aurrekontuen negoziazioan adostutakoak izan dira”.

Hortaz, Eider Mendozak segidakoa esan du: “Behin Foru Aldundia ekonomia sustatzeko planak egiteko aukerak amaitzen ari zitzaizkigula ikusita, foru araua egitea erabaki genuen, honako helburuarekin: Bildu behartzea Gipuzkoako ekonomia sustatzeko neurriak hartzea. Eta, horretarako, Gipuzkoako gizartearen, politikaren eta ekonomiaren eragileen ekarpenak izan genituen”. 

Mendozak, halaber, Bilduri egotzi dio, bakarrik ezker abertzalearen iritzia kontuan hartu izana: “Bilduk bakarrik ezker abertzalearen iritzia entzuten du. Baina ezker abertzaleak ez du soilik Gipuzkoa osatzen. Beraz, Bildu gipuzkoar gehienen iritzia baztertzen ari da, hain zuzen ere, lehenbailehen krisiari aurre egiteko neurriak hartzeko eskatzen dion iritzia”.

Azkenik, hona hemen Eider Mendozaren salaketa: “Bilduk urtero aurrekontuetan ekonomia sustatzeko aurrekontu-saila murriztu du. Eta hain handia izan da murrizketa, non EAJ-PNVk lehengo legealdietan hasitako eredua suntsitu du; hain zuzen ere, Gipuzkoaren gizarte- eta ekonomia-ongizatea bermatu duen eredua suntsitu du. Eta, aldiz, Bilduk ezarritako ereduak langabezia handitu du – Euskal Autonomia Erkidegoan langabezia gehien handitu den lurralde izan da –, eta, horrek, agerian utzi du Bilduk oso gaizki kudeatzen ari dela”.