EAJ-PNV-REN USTEZ, BILDUREN POLITIKAK GIPUZKOAKO LANGABEZIA HAZIKO DU.

Jeltzaleen bozeramaile Markel Olanoren iritziz “Foru Aldundia guztiz desagertua dago; alabaina, ez du ekimenik eta, are gehiago, aurkeztu duen bakarra EAJ-PNVrekin 2012ko aurrekontuei begira lortutako akordioan dagoena da”.

Gaur goizean INEk Estatuko langabezi-tasaren datuak eman ditu. Institutuaren arabera, Espainiako langabezi tasa %24,4 igo da eta, beraz, langabetu kopurua 5,6 milioikoa da. Hala ere, Gipuzkoan datuak bestelakoak dira: Langabezi tasa %10,93koa da, hots, 36.800 pertsona daude lanik gabe.

EAJ-PNV batzarkide taldearen bozeramaile Markel Olanok datuen hausnarketa egin du: “Ezin dugu ukatu Gipuzkoako langabezi tasa altua denik, baina baldin eta gure inguruarekin alderatzen badugu, Europako bataz bestekoa mantentzen duen lurralde bakarra gara”. Olanoren iritziz, “azken urteetan finkatutako ekonomia-egitura orekatu eta lehiakorra da datu hauen arduraduna; izan ere, Gipuzkoako lanpostuen %85 mantentzea lortu du eta, ondorioz, enpresak lehiakorrak izaten jarraitu dute”.

Hala ere, EAJ-PNVren eledunaren aburuz, “ekonomia-egitura hori arriskuan dago. Adegik esan zuen 2012.urtean atzeraldian sartuko garela eta, hori, berri oso kezkagarria da ekonomia-egoerari nekez eusten ari zaizkion enpresentzat”. Hori dela eta, Markel Olanok segidakoa esan du: “Ezinbestekoa da gure lurraldeko gizarte eragileak zein arlo ekonomikoko eta erakundeetako ordezkariek argi edukitzea lehentasun nagusiena; hau da, gure ekonomia-egitura mantentzea eta garai berrietara egokitzea”.

Era berean, Markel Olanok honakoa salatu du: “Foru Aldundia guztiz desagertua dago; alabaina, ez du ekimenik eta, are gehiago, aurkeztu duen bakarra EAJ-PNVrekin 2012ko aurrekontuei begira lortutako akordioan dagoena da”.

Olanok, halaber, Gipuzkoako Ogasunak azken urteetan izandako jarrera azpimarratu du; alta, “kinka larrian zeuden enpresei erronka berriei aurre egiteko ezinbestekoak diren inbertsioak burutzen lagundu die”. Baina aitzitik, jeltzaleen bozeramailearen ustez, “egungo Foru Ogasuna soilik diru-bilketaz arduratuta dago”.

Gainera, EAJ-PNV batzarkide taldearen eledunak segidakoa gogoratu du: “Lehengo legealdian arlo publikoaren eta pribatuaren arteko elkarlana bultzatu genuen ekonomia-egitura indartzeko; izan ere, administrazioaren eta gizarte- nahiz ekonomia-ordezkarien arteko elkarrizketa eta elkarlana ezinbestekoak dira. Beraz, horregatik jaio zen Gipuzkoa Aurrera ekimena. Egun, ordea, arlo honetan dugun errealitatea tamalgarria da”.

Azkenik, Markel Olanok Bilduren Gobernuaren eredu eza eta kudeaketarako gaitasuna salatu ditu; alabaina, “oso kezkagarriak dira bai gure enpresentzat bai enplegua mantentzen ari diren milaka gipuzkoarrentzat, baita enplegua lortu nahi duten 36.800 langabetuentzat ere”.