EAJ-PNV-K ALDUNDIA BEHARTUKO DU GOBERNU-PROGRAMARI BURUZKO OSOKO BILKURA MONOGRAFIKOA EGITERA.

Markel Olanoren iritziz, “Gipuzkoan politika arazo larria dugu, izan ere, Bilduren aginteko Foru Aldundiak urtebete igaro ondoren ez du gobernu-programa aurkeztu eta, ondorioz,  Batzar Nagusiei zein gipuzkoarroi errespetua faltatzen ari zaigu”.

Gipuzkoako Batzar Nagusietan EAJ-PNVren bozeramaile Markel Olanok eta Eider Mendoza batzarkide jeltzaleak prentsaurrekoa egin dute gaur goizean. Bertan salatu dutenez, urtebete igaro ondoren foru gobernuak ez du gobernu-programa aurkeztu, nahiz eta Foru Arau batek derrigortzen duen. 

Ildo beretik, Markel Olanok honakoa esan du: “Hiru aldiz eskatu diogu Martin Garitanori gobernu-egitasmoa aurkezteko, baina ez digu kasurik egiten”. Horrenbestez, Olanok zehaztu duenez, “muturreko erabakia hartu dugu: gehienez 15 egun barru, aldundia Batzar Nagusietan gobernu-programari buruzko osoko bilkura monografikoa egitea behartuko dugu”. 

EAJ-PNVren eledunak azaldu duenez, “Batzar Nagusietako araudiak ematen digun aukera da. Bi taldek eskatu dezakete eta, dagoeneko, babesa dugu. Gainera, beti araudiaren arabera, guk ezarriko du gai zerrenda”.

Era berean, Markel Olanok segidakoa azpimarratu du: “Nazkatuta gaude aldundiak etengabe herritarrei zein Gipuzkoako Batzar Nagusiei egiten dizkien erresptu faltekin. Eta, beraz, baldin eta salaketa publikoa egiteak balio ez badu – irailaz geroztik foru gobernuari eskatu diogu gobernu-egitasmoa aukezteko – muturreko neurriak hartu behar izan ditugu; alabaina, Gipuzkoan politika arazo larria dugu”.

Halaber, jeltzaleen bozeramaileak salatu duenez, “Martin Garitanok ez du ekimen propiorik, ez oposizioak aurkeztutako eta onartutako ekimenak betetzeko asmorik”. Honenbestez, Markel Olanok honakoa gogoratu du: “Lehengo legealdian gobernuak Kudeaketa Plangintza zehatza zuen eta, hain zuzen, Batzar Nagusietan eztabaidatua eta oposizioko alderdien proposamenak barneratuta zituen, lurraldeko erronkei aurre egiteko. Baina aitzitik, egungo gobernuaren ezaugarriak noraeza eta plangintza eza dira eta, horrela, Gipuzkoak ez dio krisialdiari aurre egingo”.  

Azkenik, Olanoren aburuz, “Martin Garitanok ez du plangintzarik. Guk, ordea, gurea dugu eta aurkeztuko dugu; izan ere, Gipuzkoako ekonomia-egoerari aurre egiteko ezinbestekoa da plangintza estrategikoa izatea, edozein enpresak egingo zukeen bezala”.

Bestalde, Eider Mendozak uztailak 12ko 6/2005 foru araua izan du hizpide: “26.artikuluan zehazten da diputatu nagusia gobernu-programa aurkeztera derrigortuta dagoela. Ez da, beraz, oposizioaren apeta, legea betetzea baizik”. Hortaz, Mendozak gogoratu du, “maiatzaren 2an gobernu-egitasmoa aurkezteko azkeneko epea bukatzen zela eta ez dugula ez programarik ez azalpenik jaso”. 

Horrenbestez, jeltzaleen batzarkideak zehaztu duenez, “ekainan Batzar Nagusiek hiru aldiz eskatutakoa ez betetzeko arrazoiak azaldu beharko ditu”, eta segidakoa azpimarratu du: “Asko kezkatzen gaitu egoera nolakoa den ikusita, gobernu programarik gabeko, ekimenik gabeko eta Batzar Nagusietan onartutako ekimenak kontuan hartzen ez dituen diputatua izateak”.