3 de mayo de 2012

EAJ-PNV-K LARRAITZ UGARTERI ESKATU DIO ERREPIDEAK KUDEATZEKO PLANA BEHINGOZ AURKEZTEKO ETA EGOERAREN ARABERAKO ERABAKIAK HARTZEARI UZTEKO.


Joseba Antxustegik zehaztu duenez, “diputatuari argitzeko eskatzen diogu eta, era berean, errepideen finantziazioaren egiturazko kudeaketaralp plangintza aurkezteko”.




Atzo Larraitz Ugarte Mugikortasun eta Bide Azpiegituretako diputatuak ViaT txartela ez duten gidariei udan bidesariak igoteko proposamena iragarri zuen. Joseba Antxustegi EAJ-PNVren batzarkidearen ustez, “egun diputatuak ez du proposamenik aurkeztu ez errepideen kudeaketarako, finantziaziorako edota mantentzea lanetarako ezta  garraio publikoa sustatzeko ere”. 

Ildo beretik, Antxustegik honakoa esan du: “Larraitz Ugartek soilik egoeraren araberako erabakiak hartzen ditu”. Honenbestez, jeltzaleen hautetsiak segidakoa salatu du: “Lehendabizi bidesaririk ez dela egongo esan zuen eta, gainera, lehengo legealdiko talde txostengilearen ondorioak bertan behera uzteko batzorde berria proposatu zuen; eta ondoren, Foru Aldunditik esan zigutenez, gipuzkoarrok bidesariak ez ezik bineta ere ordaindu beharko dugu”.   

Halaber, EAJ-PNVren batzarkidearen iritziz, “diputatuak berak batzorde txostengileko teknikarien nahiz batzarkideen lana zalantzan jarri du; izan ere, ondorioak ezagutu aurretik proposamenak egin ditu eta, are gehiago, berak hasieran egindakoen kontrakoak dira”.

Hori dela eta, Joseba Antxustegik foru diputatuari eskatu dio, “iritzia behingoz argitzeko eta garraioaren zein errepideen finantziazioaren egiturazko kudeaketa egiteko eta, beraz, egoeraren araberako neurri gehiago ez hartzeko. Hots, lurraldeko errepideak eraginkortasunez kudeatzeko egitura-sistema ezartzeko eskatzen diogu”. Hortaz, EAJ-PNVren batzarkideak kudeaketa eraginkor eta arduratsuaren adibidea jarri du: “Gure ustez, uda honetan ez dago bidesariak igo beharrik, betiere Etxegaraten bidesaria jartzen badugu eta Gipuzkoa zeharkatzen duten 10.000 kamioitik 1.000 AP-1 errepidetik igarotzera behartzen baditugu. Horrela, errepideen finantziazioaren arazoa konponduko da, alabaina, 8 milioi euro bilduko dira”.

Amaitzeko, Antxustegik azpimarratu duenez, “diputatuak lan egiteko modua aldatu du; izan ere, horrelako erabakiak lehenbailehen hartu behar dira, Bidegiren kudeaketak aldundiaren diru-kutxari eraginik ez egiteko”.

Liburuxkaren kostua

Bestalde, EAJ-PNV batzarkide taldeak hainbat galdera aurkeztu ditu erregistroan. Bertan, Mugikortasun eta Bide Azpiegituretako diputatuari Gipuzkoako etxeetara igorritako liburuxkaren informazioa zehazteko eskatu diote. Ildo beretik, jeltzaleen batzarkide taldearen aburuz, zentzugabekeria da krisialdian Gipuzkoako etxeetarako horrelako liburuxka bidaltzea eta, beraz, lan horren kostua ezagutu nahi du.

No hay comentarios:

Publicar un comentario