EAJ-PNVK FORU ALDUNDIARI ESKATU DIO DIRU-SARRERAK BERMATZEKO ERRENTA ZUZENEAN KUDEATZEKO.

Eider Mendoza batzarkidearen iritziz, “Gipuzkoako Foru Aldundiaren jarrerak Diru-Sarrerak Bermatzeko Laguntza kudeatzeko orduan kezka handia sortzen digu”.

Gipuzkoako Batzar Nagusietan EAJ-PNVren taldeak ebazpen proposamena aurkeztu du eta Foru Aldundiari honakoa eskatu dio: “Gizarte Politika arloan, lehenbailehen udalen ordezkariekin zuen harreman zuzena berreskuratzeko”. Eider Mendoza jeltzaleak azaldu duenez, “Bilduren aginteko Foru Aldundiak Diru-Sarrerak Bermatzeko Laguntza dekretu bidez onartu du eta, gainera, udalei laguntza hori kudeatzeko ardura eman nahi die, udalen ordezkariekin aldez aurretik hitz egin gabe”.

Ildo beretik, Mendozak segidakoa salatu du: “Udalek aipatutako erabakia prentsaren bidez jakin dute eta hori ez da bidezkoa; izan ere, Gipuzkoako Foru Aldundiak beti izan du harreman zuzena udalen ordezkariekin. Baina aitzitik, egun, Foru Aldundiak udalekin duen harreman bakarra batzar informatiboak izanagatik, aldez aurretik hartutako erabakien berri emateko dira”.

Era berean, EAJ-PNVren batzarkide taldeak Gipuzkoako Foru Aldundiari eskatu dio, Diru-Sarrerak Bermatzeko Errenta zuzenean kudeatzeko. Eider Mendozaren iritziz, “Udalen gizarte zerbitzuak gainezka daude. Beraz, Foru Aldundiak udalei eskumen zein eginkizun gehiago ematen badizkie, ematen dituzten zerbitzuen eraginkortasunari kalte egingo diete”. Honenbestez, Mendozak honakoa gogoratu du: “Diru-Sarrerak Bermatzeko Errentaren legeak jatorrian udalaren eskumenak zirenak LANBIDEra bideratu ditu. Hori horrela izanda eta kontuan hartuta udal teknikariak kontratatzeko diru-laguntzak desagertzeko arriskuan daudela, nola hartuko dute udalek bere gain lan-karga berria?”.

Halaber, jeltzaleen batzarkide taldeak Foru Aldundiari eskatu dio, Diru-Sarrerak Bermatzeko Laguntza eskatzen duten pertsonei lan-merkaturako sarrera errazteko hitzarmenak garatzeko. Eider Mendoza hautetsiaren aburuz, “laguntza berria jasotzeko aukera izango dutenen lan-merkaturatzea errazteko neurririk ez hartzea atzerapauso nabarmena da”.

Hori guztia dela eta, Eider Mendozaren iritziz, “Gipuzkoako Foru Aldundiaren jarrerak Diru-Sarrerak Bermatzeko Laguntza kudeatzeko orduan kezka handia sortzen digu; izan ere, agerian utzi du Gizarte Zerbitzuen arloko neurri eraginkor bat hondatzeko duen gaitasuna”.