MARKEL OLANO: “BOTEREEN BANAKETA AINTZAT EZ HARTZEAK AURREKARIRIK GABEKO GATAZKA SOR DEZAKE”.

EAJ-PNV batzarkide taldearen bozeramaileak azpimarratu ditu, Gipuzkoako Hiri Hondakinen Kudeaketa Plan Orokorraren babesa, krisia gainditzeko neurriak eta gehien behar dutenei laguntza ematea, eta gatazka politikoa gainditzeko erabakitzeko eskubidearen garrantzia.

Gobernu programari buruzko gai bakarreko osoko bilkuraren bigarrengo saioan taldeek egitasmoari ekarpenak egiteko mozioak eztabaidatu eta onartu dituzte. Aurkeztutako mozioen defentsa egiteko txandan, EAJ-PNV batzarkide taldearen bozeramaile Markel Olanok Batzar Nagusien papera azpimarratu du: “Baldin eta demokrazia benetakoa bada, botere banaketa badago eta gobernuak bere eginkizuna betetzen badu, Batzar Nagusiek onartutako legeak bete behar dira; izan ere, legeak egiteko ardura dute. Bestela, zertarako balio dute Batzar Nagusiek?”. Honenbestez, Olanok honakoa esan du: “Gobernu honek botereen banaketa aintzat hartzen ez badu, aurrekaririk gabeko gatazka sor daiteke”.

Jeltzaleen bozeramailearen iritziz, “botereen banaketak honakinen kudeaketari eragiten dio”. Ildo beretik, Markel Olanoren ustez, “nahiz eta hasieran Foru Aldundiaren Gobernuak eztabaida Batzar Nagusietatik kanpo utzi nahi zuela irudikatu, badirudi hilabete batean ganberan izango dugula gobernuaren proposamena ezagutzeko eta eztabaidatzeko”. Hala ere, Olanok azpimarratu duenez, “gaur Batzar Nagusietako ordezkari gehienen borondatea argi geldituko da. Ikusteke dago, ordea, Foru Aldundiaren Gobernuak gehiengoaren erabakia errespetatuko duen ala ez”.

Krisi egoerari buruz, EAJ-PNVren eledunak Bilduren aginteko Foru Aldundiaren gobernuaren ekimen eza kritikatu du; “alabaina, soilik EAJ-PNVrekin 2012ko aurrekonturako adostutako neurriak martxan jarri ditu”. Horrenbestez, Markel Olanok Bilduri eskatu dio, “krisia gainditzeko konpromisoa azaltzeko eta arlo pribatuarekin elkarlanean aritzeko”.

Era berean, Olanok azpimarratu duenez, “zerga-politika arloan aurkeztutako mozioak Gipuzkoako enpresei laguntzeko dira, lurraldeko ekonomiaren eragileak izaten jarrai dezaten eta, betiere, Gipuzkoako hainbat familia zein pertsonak pairatzen ari diren ondorioak kontuan hartuta”. Hortaz, jeltzaleen hautetsiak segidakoa esan du: “Kalean egoera larriak bizi ari dira eta, beraz, pertsona horiei laguntza ematen dieten gizarte sareak laguntzeko eskatzen dugu, besteak beste, Caritas eta Elikagaien Bankua”.

Politika-egoeraren gainean ere hitz egin du EAJ-PNVren eledunak: “Bake prozesu baten hasieran gaude eta, hori dela eta, printzipio nahiz estrategia batzuk elkartu behar dira: alde batetik, printzipio etikoa dago, hots, ez dago proiekturik ez arrazoirik pertsonen gainetik; eta bestetik, printzipio demokratikoa, hau da, bortizkeria gaindituta politika-proiektu guztiak onartu behar dira”. Ildo beretik, Olanoren aburuz, “oso garrantzitsua da erabakitzeko eskubidearen garapena gatazka politikoari irtenbidea emateko, nahiz eta ETAk armak utzi dituen”.

Gainera, EAJ-PNVren bozeramailearen iritziz, “elkarbizitza eta berradiskidetze prozesuak ezinbestekoak dira. Horretarako, Bakearen gaineko batzorde txostengilea proposatu genuen Batzar Nagusietan”. Era berean, Markel Olanok biktimen papera nabarmendu du: “Lehengo legealdian Foru Aldundiak biktima guztiei babesa emateko plana onartu zuen”. Horrenbestez, Olanok aldundiari eskatu dio, memoria selektiborik ez izateko, izan ere min handia egin dezake, ETAk eragindako kaltea ez duelako kontuan hartzen.

Azkenik, jeltzaleen batzarkide taldearen eledunak Foru Aldundiaren Goberuari eskatu dio, kirola bultzatzeko gizartearen osasuna hobetzeko eta integrazioa lortzeko; garraio publikoaren eta txirrindaren erabileraren  sustapenean aurrerapausoa emateko; eta baserritarrei laguntzeko”.  

Bozaren azalpena

Bigarren txandan, Markel Olanok taldeka aurkeztu du talde jeltzalearen boza mozioei. Hautetsi jeltzaleak esandako guztiak berretsi ditu: “Gipuzkoako Hiri Hondakinen Plangintza Orokorraren babesa; krisia gainditzeko ikuspegi orokorra; txartel bakarraren eta garraio publikoaren sustapena; printzipio etiko eta demokratikoen gainean adostasuna eta ETAren biktimen zein presoen ikuspegiak aintzat hartzea; eta udalekin harremanak sendotzea eta Eudel babestea”.

Amaitzeko, Olanok segidakoa esan du: “Oposiziotik Foru Aldundiaren Gobernuari bidea erakutsi diogu. Batzar Nagusiek euren lana ondo egiten ari dira eta hori da, hain zuzen, jarraitu beharreko bidea; hots, guztion arteko adostasuna eta elkarlana Gipuzkoak aurrera jarrai dezan”.