EAJ-PNV-K SALATU DU LARRAITZ UGARTEREN ERREPIDEEN GAINEKO ERABATEKO EZJAKINTASUNA ZEIN ERAKUTSITAKO JARRERA TXOLINA ETA HARROPUTZA

Jeltzaleen batzarkide taldearen bozeramaile Markel Olanoren ustez, “Larraitz Ugarte Mugikortasuneko eta Bide azpiegituretako foru diputatuak ez du irakurri lehengo legealdian Etxegaraten kamioientzako bidesaria jartzeko proiektua”.   

Mugikortasun eta Bide Azpiegituretako foru diputatu Larraitz Ugarte prentsaurrekoa egin du gaur goizean eta, bertan, EAJ-PNV gezurretan ari dela esan du. Horren ondorioz, hona jeltzaleen bozeramaile Markel Olanoren adierazpenak: “Beste behin, Ugarte foru diputatuak nabarmen geratu da; izan ere, honakoa esan du: ‘Ez dugu Foru Arau berririk egingo AP-8 eta AP-1 errepideak erabiltzeagatik ViaT txartelaren erabiltzaileek gehienez 25 euro ordaintzeko neurria martxan jartzeko’. Hala ere, errealitatea bestelakoa da eta, alegia, Foru Aldundiak gai horren gaineko Foru Arau proiektua aurkeztu du”. Era berean, EAJ-PNVren bozeramaileak iragarri du, “Foru Arau proiektu horri zuzenketa aurkeztuko diogula, Etxegarateko bidesariaren ezarpena sar dezaten”.

Gainera, Olanok foru diputatuari erantzun dio, alabaina Larraitz Ugarteren iritziz EAJ-PNV gezurretan ari da, Etxegaraten bidesaria jartzearekin 53 milioi euro bilduko direla esaten duenean: "Ugarte foru diputatuaren ezjakintasunagatik Gipuzkoako diru-kutxak ez du jasoko aipatutako diru-kopuru hori".Ildo beretik, Markel Olanok Larraitz Ugarteri segidakoa gogoratu dio: “Etxegaraten kamioiei bidesaria ezartzeko proiektua Mugikortasun eta Bide Azpiegituretako departamentuan dago. Bertan, Irungo Bentak eta Etxegarateren bidesarien arteko komunikazio- eta kontrol-sistema aurreikusten da eta, ondorioz, Gipuzkoa zeharkatzen duten atzerriko kamioiak – egunero 10.000 – guztiz kontrolatuak eta erregistratuak egongo dira”.   

Horrenbestez, EAJ-PNV batzarkide taldearen eledunak azpimarratu duenez, “egin dugun kalkulua honakoa izan da: Etxegarateko bidesaria eta AP-8 zein AP-1 errepideetatik joateagatik ordaintzen dena parekatu dugu; hots, egindako hipostesia benetako datuetan nahiz informazio publikoan oinarrituta dago”. Hortaz, Markel Olanok Ugarteri gonbita egin dio, “Gipuzkoako gure alderdiaren web gunean sartzeko (www.gipuzko.com) eta, bertan, egindako kalkuluei buruzko koadroa aztertzeko”.

Olanok halaber, segidakoa esan du: “Lehengo ostiralean emandako datuak bere horretan mantentzen ditugu eta, behar izanez gero, Mugikortasun eta Bide Azpiegituretako batzordean aurkezteko prest gaude, aztertu eta eztabaidatu daitezen”.

Hori guztia dela eta, EAJ-PNVren bozeramailearen aburuz, “Larraitz Ugarte foru diputatuaren jarrera harroputza eta txolina agerian gelditu da eta, era berean, gaiari buruz duen ezjakintasuna. Horrenbestez, ez du bere iritziaz gaineko ezer ulertzen eta, beraz, ez da gai sail hain garrantzitsua kudeatzeko”.