XABIER EZEIZABARRENA: "BADIRUDI IÑAKI ERRAZKIN FORU DIPUTATUAK EZ DUELA GERTATUTAKOAREN BERRI ETA, BERAZ, ATZERA BOTATAKO BILDUREN HONDAKINEN KUDEAKETARAKO PLANAREN KOPIA AURKEZTU DIGU”.

Batzarkide jeltzalearen iritziz, “muturreko Ezker Abertzalearen tesiek agintzen dute, beste hainbat gaietan bezala. Are gehiago: Bilduk gaia Batzar Nagusietatik, mankomunitateetatik edota udaletatik haratago eramango du eta alderdikeriaz erabiliko du”.

Ingurumeneko eta Lurralde Antolaketako foru diputatu Iñaki Errazkin Gipuzkoako Batzar Nagusietan agertu da eta, bertan, berak zuzentzen duen sailaren helburu nagusiak azaldu ditu. EAJ-PNVren batzarkide Xabier Ezeizabarrenak foru diputatuaren jarrera kritikatu du: “Oposizioak aginduta etorri da Batzar Nagusietara. Are gehiago: ganbera honen aurrean bere asmoak azaltzen dituen lehenengo aldia da. Horrek argi uzten du Bilduk ez dituela Batzar Nagusiak aintzat hartzen eta, beraz, behin eta berriro errespetua galtzen die”. 

Era berean, Ezeizabarrenak honakoa esan du: “Badirudi Iñaki Errazkinek ez duela azkeneko hilabeteotan gertatutakoaren berri. Gogoan izan, bere aurretik kargudun Juan Carlos Alduntzini zentsura-mozioa egin zitzaiola, Batzar Nagusietako gehiengoaren nahia ez errespetatzeagatik. Hortaz, Errazkinek aurkeztu diguna Alduntzinek aurkeztutakoaren kopia baino ez da”.

Jeltzalearen aburuz, “politika-arazoa dugu; izan ere, Ingurumeneko foru diputatu berriak esan duenez, akats bera egiten jarraituko du, nahiz eta ganberak kontrakoa esaten duen eta gutxiengoan gobernatzen duten”. Gainera, Xabier Ezeizabarrenak segidakoa gogoratu du: “Herri nahiz mankomunitate gehienek ez dute bere plana babestu”.  

Ezeizabarrenak, halaber, Bilduren manipulazioa salatu du, “ez baitu erantzunik eman errauketa-instalazioaren eraikitze-lanak gelditzearen kostuari buruz, ez Gipuzkoan ezarriko dituen zabortegi berrien kokapenari buruz”. Ildo beretik, EAJ-PNVren hautetsiaren ustez, “Europak ez du ezer esan Bilduren hondakinen planaren gainean, nahiz eta Bilduk babestu duela esan duen. Gainera, Europak ezin du plangintza hori babestu Europako zuzentarauen aurka egiten duelako”.

Amaitzeko, Xabier Ezeizabarrenak Foru Aldundiari eskatu dio erakundearen izen onari kalterik ez egiteko: “Ez du proposamena babesteko finantza-plangintzarik eta, are okerrago, beste taldeekin ados jartzen ahalegindu direla esaten dute, baina egia bestelakoa da: ez dute borondaterik erakutsi, izan ere, ez dute plana Batzar Nagusietara ekarri eztabaidatzeko”. Horrenbestez, Ezeizabarrenaren aburuz, “argi gelditu den gauza bakarra honakoa da: muturreko Ezker Abertzalearen tesiek agintzen dute, beste hainbat gaietan bezala. Are gehiago: Bilduk gaia Batzar Nagusietatik, mankomunitateetatik edota udaletatik haratago eramango du eta alderdikeriaz erabiliko du”.