EAJ-PNV-REN USTEZ, FORU ARAU PROPOSAMENA DA BILDUK GEHIENGOAK ERABAKITAKOA BETETZEKO BIDEA.

Eider Mendoza jeltzalearen iritziz, “Foru Aldundiak hitz egiteaz aparte, hitza eman eta bete behar du, baina ez du borondaterik”.

Politika orokorreko osoko bilkurak jarraitu du gaur Batzar Nagusietan eta, bertan, batzarkide taldeek aurkeztutako mozioak eztabaidatu eta bozkatu dira. Eider Mendoza hautetsi jeltzaleak Martin Garitano foru diputatuak astelehenean egindako hitzaldia kritikatu du: “Xederik gabekoa izan zen, hain zuzen, Patxi Lopez lehendakariaren antzekoa; izan ere, oposizioa egiten pasa zuen hitzaldi guztia”. Hori dela eta, Mendozaren ustez, “baldin eta Bilduren aginteko gobernuak noraezean jarraitzen badu, guk hutsune horiek beteko ditugu”.

Ildo beretik, batzarkide jeltzalea azaldu duenez, EAJ-PNVk aurkeztutako mozioak bi  oinarri dituzte: “Politiko-demokratikoa eta politiko-etikoa. Hau da, herri bat osatzen dugulako ekimenak eskatzen dizkiogu diputatu nagusiari, eta ez dagoelako proiekturik ez egitasmorik pertsonen duintasunaren gainetik”.

Era berean, Eider Mendozak Foru Aldundiari segidakoa egotzi dio: “Ez du programarik, ez arauak egiteko egutegirik. Horregatik, foru diputatuek legealdi hasieran hartutako konpromisoak betetzeko eskatzen dugu. Izan ere, argi dago Gobernuak oposizioak onartutako ebazpenak ez dituela beteko, beraz, beraiek hartutako konpromisoak behintzat gauzatzeko eskatzen dugu, urte eta erdi pasa delako eta ez dugulako ikusi ezer egin dutenik”.

Mendozak, halaber, kritikatu du, “Bilduren aginteko Foru Aldundiak ez duela aintzat hartzen Batzar Nagusien, ez gipuzkoarron borondatea. Horrenbestez, oposiziotik zerbait egin beharko dugu kasu egin dezaten”. Hortaz, hautetsi jeltzalearen aburuz, “Foru Arau proposamena da irtenbide bakarra onartutakoa betetzeko; izan ere, hartutako erabakia loteslea da. Horregatik, ekonomia sustatzeko foru araua proposatu dugu, Foru Aldundiak krisiari aurre egiteko plana egin dezan”.

Aipatutako foru arauari buruz, Eider Mendozak PSEren jarrera salatu du: “Ez du ekimen sendorik aurkeztu eta, beraz, abstenitu dira, bere proposamena izan ez delako. Ondorioz, proposamenak ez du aurrera egin”. Hala, Mendozak alderdi sozialistari eskatu dio, “bere lekua topatzeko, izan ere galduta dabil. Egun batean gauza bat esaten du eta hurrengoan kontrakoa. Jarrera horrek oposizioak aurkezten dituen ekimenak ahultzen ditu”.

Ekonomiaren arloa izan da batzarkide jeltzalearen hitzaldiaren oinarria: “Arlo guztiek dute ekonomiaren sustapena oinarri. Aberastasuna sortu behar da egungo sistema mantentzeko. Esaterako, baldin eta Foru Aldundiak ekonomia sustatzeko neurriak hartzen ez baditu, gizarte politikak mantentzeko zailtasunak izango ditu. Orobat, ez dugu enplegua sortzeko ekimenik ikusi. Badirudi Bilduri diru-bilketak baino ez diola axola”.

Era berean, Eider Mendozak azkeneko 15hilabeteotan hainbat departamentutan egindakoak ere izan ditu hizpide: “Azpiegituretan, Larraitz Ugarte foru diputatuak asmoa du foru arau berria egiteko, baina nahita ezkutatzen du. Gainera, Mayor Orejaren aitzaki bera erabiltzen du, alegia, Batzar Nagusietan heldutasun falta dagoela. Eta, bitartean, Foru Aldundiak errepideen arloan markak hautsi ditu: Etxegaraten bidesaririk ez jartzeko erabakiak suposatzen du Foru Aldundiaren diru-kutxan urtean 53milioi euro gutxiago jasotzea”.

Hondakinen kudeaketaren gainean, hautetsi jeltzaleak honakoa esan du: “Argi dago Bilduk ez duela asmorik gehiengoak onartutakoa betetzeko. Beraz, eskatzen diogu denbora gehiago ez galtzeko eta indarrean dagoen foru araua nahiz Europak ezartzen dituen neurriak betetzeko; hau da, zabortegi berririk ez irekitzeko eta inposiziorik ez egiteko”.

Parte-hartzeari buruz ere hitz egin du Eider Mendozak: “Ezker Abertzalearen parte-hartze eredua inposizioa da. Teoría erraza da, alegia, Ezker Abertzaleak dio gizartearen ordezkariekin hitz egiten duela, baina errealitatea bestelakoa da: herritarrekin egon bai, baina ez dituzte entzuten ez eskariak haintzat hartzen”.

Politika egoeraren gainean, Mendozak Bilduri eskatu dio, “leziorik ez emateko. Kataluniara begira daude, hain zuzen, Ibarretxe lehendakariak duela urte batzuk egindako ibilbide berberari. Orduan ez zuten adorerik izan alde bozkatzeko, ez Estatutu Politiko berriari, ez kontsultaren legeari”.

Gainera, Eider Mendozak, koalizio abertzaleari dei egin dio, “Martin Garitano ez parekatzeko Agirre lehendakariarekin. Izan ere, Agirre lehendakaria bezalako Euskal Herriaren historiaren irudi garrantzitsuenetako baten aurkako erasoa da”.

Azkenik, EAJ-PNVren batzarkideak Foru Aldundiari leporatu dio, “ez dela beharrezkoa egiten ari. Asko hitz egiten du, baina horretaz gain, hitza eman eta bete behar du, baina ez du borondaterik. Horregatik, guk bidea erakutsiko diogu”.