MARKEL OLANO: “KRISIAREN AURKAKO PLANIK MARTXAN EZ JARTZEKO BILDUREN ERABAKIAK GIPUZKOA KINKA LARRIAN UZTEN DU”.

EAJ-PNV batzarkide taldearen bozeramaileak honakoa esan du: “EAJ-PNVk krisiari aurre egiteko konpromisoa hartuko du eta, horretarako, neurriak hartuko ditugu eta plangintza bat osatuko dugu, nahiz eta Foru Aldundiaren nahia hori ez izan”.

Martin Garitano diputatu nagusiak iragarri duenez, Gipuzkoako Foru Aldundiak ez du martxan jarriko krisiaren aurkako planik, nahiz eta Batzar Nagusiek hala onartu eta eskatu zioten. Erabaki horrek, EAJ-PNVren haserrea piztu du. Hona hemen Markel Olano jeltzaleen eledunaren hitzak: “Bilduk Gipuzkoa kinka larrian utzi du”.

Ildo beretik, Olanoren ustez, “Bilduri bost ajola, besteak beste, azkeneko lau urteetan Gipuzkoan 8.200 enpresa desagertu izana, langabezi-tasa igotzen jarraitzea edota industria-produkzioaren indizeak behera egitea. Egoera horri aurre egiteko Bilduren aginteko gobernuak krisiaren aurkako planik martxan ez jartzea oso larria da”.

Era berean, EAJ-PNVren bozeramaileak segidakoa esan du: “Foru Aldundiaren erabakiak plangintza faltaren adibide da, izan ere, ez du planik izango ez orain, ez legealdi osoan zehar. Hori dela eta, EAJ-PNVk krisiari aurre egiteko konpromisoa hartuko du eta, horretarako neurriak hartuko ditugu eta plangintza bat osatuko dugu, nahiz eta Foru Aldundiaren nahia hori ez izan”.

Planik ez izatearen ondorioz, Sarbideak programa bertan behera

Sarbideak programa kentzearen gainean, Markel Olanok ondorego adierazpenak egin ditu: “Foru Aldundiak Sarbideak bezalako programa – arazoak dituzten kolektiboen lan-txertatzea lortzeko programa –  kendu du eta, beraz, Bilduk gizartea egituratzeko konpromisoa lurralde- zein gizarte-orekaren ikuspetigik bertan behera gelditu da”.

Jeltzaleen bozeramailearen aburuz, “milaka gipuzkoar lanean hasteko aukerarik gabe geldituko dira. Plangintza falta horren ondorioz, Foru Aldundiak ezingo die aurre egin”.