EAJ-PNV-K SALATU DU, LARRAITZ UGARTE MUGIKORTASUN ETA BIDE AZPIEGITURETAKO FORU DIPUTATUAK INFORMAZIOA MANIPULATU ETA FALTSUTU DUELA LEHENGO GOBERNUAREN IZEN ONA ZALANTZAN JARTZEKO.

Aintzane Oiarbide jeltzaleak honakoa gogoratu du: “Hartutako erabaki guztiak txosten tekniko eta juridikoen iritziak kontuan izan zituzten. Egun, ordea, foru diputatuak ez du horrela egiten; hau da, ez du Foru Aldundiaren teknikoenganako konfiantzarik”.

Mugikortasun eta Bide Azpiegituretako foru diputatu Larraitz Ugarte Gipuzkoako Batzar Nagusietan agertu da eta, bertan, Herri Kontuen Euskal Epaitegiaren azkeneko txostenaren berri eman du. EAJ-PNVren batzarkide Aintzane Oiarbideren ustez, “foru diputatuak ez du txostenaren gainean hitz egin eta, hori, oso larria da. Argi geratu da, beraz, foru diputatuak ez duela kudeaketari buruzko informazio gardena eman nahi. Horren ordez, informazioa manipulatu egiten du helburu jakin batekin: lehengo gobernuaren izen ona zalantzan jartzea”.  

Era berean, Oiarbidek segidakoa gogoratu du: “Martin Garitano foru diputatuak 2009ko txostenari alegazioak aurkeztu zizkion eta, beraz, lehengo gobernuaren bide azpiegituretako kudeaketa babestu zuen. 2010ko txostenari, ordea, ez dio alegaziorik aurkeztu, nahiz eta 2009ko alegazioek berauek balio zuten, eta, beraz, ez teknikarien irizpideak ez ditu kontuan izan”. Aintzane Oiarbideren aburuz, aurrekaririk gabeko gertaera da: “Hortaz, diputatuak bere jarrerarekin ez du gertatutakoa argitu nahi. Are gehiago, bere helburua bestelakoa da: komunikabideetan eztabaida nahastea, herritarren iritziak manipulatzeko”.  

Gainera, hautetsi jeltzaleak honakoa esan du: “Hainbestekoa da Larraitz Ugarte foru diputatuaren manipulazioa, ezen ustez Herri Kontuen Euskal Epaitegiaren hitzak erabili ditu, nahiz eta txostenean agertzen ez diren. Hori dela eta, eskatu diogu esandakoak non agertzen diren argitzeko, baina ezin izan dio galderari erantzun, hitz horiek ez baitaude txostenean”.

Aintzane Oiarbidek, halaber, azpimarratu duenez, “lehengo legealdian hartutako erabakiak txosten juridiko eta teknikoen iritzian oinarritu ziren. Egun, ordea, ez da hori gertatzen, izan ere, Larraitz Ugartek ez du teknikarienganako konfiantzarik. Nola kudeatuko du departamentua bertako langileen lanean ez badu sinisten? Foru diputatuak ez du konfiantza eza hori ezkutatzen eta, horrexegatik, arduratuta gaude”.

Amaitzeko, Oiarbidek Mugikortasun eta Bide Azpiegituretako foru diputatuari eskatuko dio, gaur esandako guztiak idatziz argitzeko.