EAJ-PNV-K GOGOR LAN EGINGO DU, KRISIARI AURRE EGITEKO PLANAREN ETA ERRAUSKETA-INSTALAZIOAREN ERAIKUNTZAREN ALDE

Markel Olanoren iritziz, “hondakinen kudeaketan herritarrek ez ligukete barkatuko amore ematea Bilduren estrategiaren aurrean”.

Hona hemen PP batzarkide taldearen osoko zuzenketa eztabaidatzeko osoko bilkuran, Markel Olano EAJ-PNV batzarkide taldearen bozeramailearen hitzak: “Aurrekontua hobetzeko gure proposamenaren alde egiten jarraituko dugu; izan ere, ez dugu aurrekontua ontzat ematen eta, ondorioz, zatiko zuzenketak proposatu ditugu”.

Horren harira, Olanok segidakoa gogoratu du: “Ez dugu osoko zuzenketarik proposatu koherenteak izan garelako Iñigo Urkullu lehendakariak beste alderdiei egindako proposamenarekin: euskal erakundeen aurrekontuak ez oztopatzea krisiari aurre egiteko”.

Horrenbestez, jeltzaleen batzarkide taldearen bozeramaileak azaldu duenez, “Foru Aldundiaren aurrekontuak bi alor babestu behar ditu: krisiari aurre egiteko aurrekontu-sailak eta hondakinen kudeaketa, gizarte politikak ahaztu gabe – gogoan izan murrizketa handia izan dutela –”.

Krisiari aurre egiteko neurrien gainean, Markel Olanok honakoa azpimarratu du: “Bilduren aginteko Foru Aldundiak ez du estrategiarik krisiari aurre egiteko. Horregatik, Bilduri eskatu diogu eta, era berean, eskua luzatu diogu legealdirako krisiaren aurkako plana negoziatzeko. Horrek, ordea, ez du esan nahi ekonomia sustatzeko foru arau proposamenik egingo ez dugunik. Izan ere, horretan ari gara lanean eta martxoan aurkeztuko dugu”.

Olanok, halaber, oso argi hitz egin du honakinen kudeaketari buruz: “Herritarrek ez ligukete barkatuko Bilduren estrategia antidemokratikoaren aurrean amore emango bagenu. Hau da, Foru Aldundiak ez du aintzat hartzen Batzar Nagusien gehiengoaren iritzia; atez ateko bilketa sistema imposatu egiten du, eta Gipuzkoako Hiri Hondakinen Kudeaketa Plangintza Orokorraren (PIGRUG) ekonomia- eta finantza-plana erabili nahi du bere estrategia egiteko”.  

Hortaz, Markel Olanok esan du, 17 milioi euroko zuzenketa proposatu dugula PIGRUG-en aurreikusitako azpiegiturak egiteko eta, bereziki, Zubietako errausketa-instalazioa. Bilduk atzera egiteko eskatu digu, baina guk ados jartzeko oinarria dela esan diogu”.

Era berean, jeltzaleen eledunak oposizioko beste alderdiei ados jartzeko gonbita egin die bai hondakinen kudeaketan, bai beste hainbat gaitan: “Gure ustez, oposizioak gobernuari egitekoa baldintzatu diezaioke. Izan ere, oposizioa eraginkorra izaten ari da eta, orain, foru gobernuak errespetatu beharko du Batzar Nagusien gehiengoak onartutakoa”.

Azkenik, Markel Olanok honakoa azpimarratu du: “Gure proposamenarekiko leialak eta irmoak izaten jarraituko dugu. Bilduri argi esan diogu non egon gaitezken ados eta non ez. Hau da, malguak izango gara, baina ez dugu Foru Aldundiaren betorik onartuko”.