EAJ-PNV-K SALATU DU BILDU ETA PSE ALDERDIEN ARTEKO AKORDIOA, GIPUZKOAKO EKONOMIARI KALTE EGITEN DIOLAKO

Itziar Agirre jeltzalearen ustez, “sozialisten eta koalizio abertzalearen arteko gaurko adostasunak enpresak deskapitalizatuko ditu eta, ondorioz, ekonomiaren sustapenaren aurkakoa da”. 

Bildu eta PSE alderdien arteko zerga-ituna argi gelditu da gaurko Ogasun eta Finantzetako batzordean; eta, besteak beste, Fortuna Handien gaineko Zerga onartu dute. EAJ-PNVren batzarkide Itziar Agirreren iritziz, “Bildu eta PSE alderdien arteko adostasunak Gipuzkoako familia-enpresei kalte egiten die, izan ere, enpresen akzioak saldu beharko dituzte Foru Aldundiaren – alderdi sozialistaren aldeko bozka izan du – zerga berria ordaintzeko”.

Ildo beretik, Agirrek Bilduren eta PSEren jarrera salatu du, “Gipuzkoako ekonomiari kalte egiten diolako”, eta, horrenbestez, honakoa azpimarratu du: “Bi alderdi horiek gauza bakarra lortuko dute: enpresak dekapitalizatu eta, ondorioz, ekonomia-sustatzearen kontrako efektua”. Horrenbestez, hautetsi jeltzaleak segidakoa esan du: “foru arau berriari esker oso aberatsak direnek eta zerga-babesa erabiltzen ez dutenek gutxiago ordainduko dute eta, beraz, empresa-gizon/emakume txiki edo ertainari gehiago ordainaraziko dio; izan ere, enpresaren jardueraren ondasunengatik ordaindu beharko dute”.

Era berean, EAJ-PNVren batzarkidearen aburuz, “gure helburua honakoa da: foru arau aurrerakoia eta beste lurraldeekin bateratua egitea. Horren baitan, foru arauaren izena dago. Gure ustez, ez luke izena aldatu behar; izan ere, Foru Aldundiak proposatutako foru arau berriak oso gutxi aldatzen du Ondareen gaineko Zerga arautzen duena”. 

Itziar Agirrek, halaber, foru arauak Gipuzkoako enpresenganako izango duen eragina izan du hizpide: “Gipuzkoako enpresen %90 txikiak edo ertainak dira, alegial, familiarrak eta 250 langile baino gutxiago dutenak. Ekonomia-jarduera horri egingo dio kalte. Beraz, ezin dira nahastu norberaren ondarea eta ekonomia-jarduera, kalte egiten baitzaie bai jarduerari, bai enpresa horietako langileei”.

Azkenik, Agirreren ustez, “badirudi zeinbait alderdik borrokan ari direla ezkertiar edo aurrerakoienak direla erakusteko, baina gauza oso garrantzitsua ahaztu egiten dute, alegia, lurraldean eta herrialdean bizi dugun egoera. Hori dela eta, EAJ-PNVk lanean jarraituko du beste lurraldeekin ados jartzeko eta zerga bateratua izateko”.