EIDER MENDOZA: “KRISIARI AURRE EGITEKO GIZARTE ITUNA EGITEA BEHARREZKOA DA”.

EAJ-PNVren batzarkideak Rajoy Espainiako presidentearen gizarte babeserako legearen aurka azaldu da eta honakoa esan du: “Ardura bata besteari leporatzeari uzteko eta arduratsu izateko garaia dugu”.

EAJ-PNVren batzarkide Eider Mendoza oso argi mintzatu da gizarte-babeserako zerbitzu publikoen denfentsaren proposamenaren gainean: “Gizarte ituna behar dugu, Krisiari aurre egiteko eta herriak aurrera jarrai dezan”. Ildo beretik, Mendozak honakoa gogoratu du: “Gizarte ituna EAJ-PNVren aspaldiko proposamena da. Patxi Lopez lehendakari zela eta ekonomia egoera larria zela, EAJ-PNVk esan zuen gizarte babes sistema bere horretan mantendu behar zela, herritarrik ez baztertzeko”.  

Horrenbestez, batzarkide jeltzaleak segidakoa esan du: “Urteak eman ditugu gizarte babeserako sistema lantzen eta, beraz, bada garaia indartzeko eta, ondorioz, langabeziaren egoera, enpresen itxiera etan industria-jardueraren beherakada ekiditeko”. Izan ere, Eider Mendozaren aburuz, “krisiak pertsonei eragiten die eta, horren ondorioz, gero eta herritar zein familia gehiago pobrezian daude eta Caritas bezalako erakundeei laguntza eskatu behar diete. Hau da, pertsona horiei laguntza eman behar diegu gizarte babeserako sistemaren bidez”.

Mendozak, halaber, gainerako alderdi politikoen jarrera kritikatu du: “PSEk ez du memoriarik. Sozialistak izan ziren lehenak murrizketak egiten Eusko Jaurlaritzan, eta PPren babesa izan zuten. Orain popularrek Rajoyren lege proposamena babesten dute, hain zuzen, gizarte babeserako sisteman egindako lana bertan behera uzten duena. Eta egun alderdi socialista Bildurekin akordioa egin nahi du, izan ere gizarte-zerbitzuak mantendu behar dira. Baina aitzitik, errealitatea bestelakoa da: Gipuzkoako Foru Aldundiaren Gizarte Politikako departamentuko aurrekontua 5,2 milioi euro murriztu dute eta, ondorioz, zerbitzu guztiak kaltetuak izango dira”.

Hortaz, EAJ-PNVren hautetsiak honakoa adierazi du: “Langabezi-tasa handitzen ari da eta, horrekin batera, gizarte-laguntzen beharra. Bitartean, alderdi politikook ereduen gainean eztabaidatzen ari gara. Hainbat eredu daude eta norberak bere eredua du, beraz, ardurak bata besteari egozteari utzi behar diogu eta jarrera arduratsua izaten hasi behar dugu, gizarte-ituna lortzeko herriak aurrera jarrai dezan”.