BELDURRA, LISKARRA ETA HAUSTURA

Ezker Abertzaleko eta Gipuzkoako Foru Aldundiko arduradunak gero eta adierazpen publiko gehiago ari dira egiten bolada honetan EAJ-PNVri buruzko salaketa faltsuen bidez Gipuzkoako herritarrak engainatzeko asmotan. Hori dela eta, honako gogoeta hauek egin nahi ditugu:

1.- Ezker Abertzalea Gipuzkoako herritar guztien dirua xahutzen ari da, hilero 300.000 euro, indarrean dagoen foru-araua urratzen ari delako eta zaborren plan integrala eta erraustegiaren nahiz aurre-tratamenduko beste planta batzuen garapena gelditzen. Hondakinen kudeaketa paralizatzera daramate eta egoera blokeatzera, eta Ezker Abertzalea da horren erantzule bakarra.

2.- Ezker Abertzaleak argitu beharra dauka Gipuzkoako Foru Aldundia zergatik ez den betetzen ari aldiro-aldiro bereak dituen obligazioak, izan behar duen itzala galduz eta gipuzkoar guztien izen ona zikinduz. Jakin nahi dugu zergatik dauden geldituta lanak, zergatik ez dituzten egiten eta non geratu den helburu zehatz eta adostua zeukan dirua. Zergatik inposatu nahi du Ezker Abertzaleak bere egitasmo totalitarioa?

3.- Ezker Abertzaleak azaldu beharra die Gipuzkoako herritarrei zergatik aukeratu duen inposizioaren eta beldurraren kultura. Ze gizarte-eredu eraiki nahi dute herritar bakoitzaren bizitza kontrolatuz? Ze etorkizun eraiki daiteke beldurraren eta salaketaren gainean?

4.- Gaur egun, Ezker Abertzalea ez da gai lurralde honetako arazoei heltzeko eta aurre egiteko: kudeaketarako erabat ezgauza delako baina batik bat liskarra besterik ez duelako bilatzen, borroka pertsonala eta min egitea, irainduz edota gezurra esanez. Beldurraren kultur politikoa ari da sortzen, errespetuaren eta elkarrizketaren kultura beharrean.

5.- Ezker Abertzalea kontratuen utzikeria, zabarkeria eta kitapenen erantzulea da eta horrek ondorioak dauzka. Beti. Eta Ezker Abertzalea da bere ekintzen ondorioen arduraduna. Erantzukizuna Ezker Abertzalearena da, ez beste inorena. Eta eskuz aldaezina da.

6.- Ezker Abertzaleak hasiera-hasieratik daki Europako Inbertsio Bankuaren mailegua eta merkatal bankuarena –Caixa eta Banesto–, hondakinen kudeaketarako foru-arauak jasotzen dituen azpiegituretarako sinatua izan zela, eta jarduera-egutegi oso zehatza zeukala, Gipuzkoan sortzen diren hondakinen kudeaketa-arazoa behin betiko konpontzeko eta zabortegien itxiera gauzatzeko, zuzentarau europarren arabera.

7.- Ezker Abertzaleak badaki, aurreikusita dagoen inbertsio-planaren arabera, honezkero hasita edota amaituta beharko zuketela 98 miloi euro balio duten azpiegiturak. Baina Ezker Abertzaleak ez du aurrerabiderik egin. Alderantziz, Ezker Abertzaleak egin duena da dena gelditu. Alduntzin jauna, Diputatu Nagusiak kargutik kendua Batzar Nagusien aginduz eta gaur egun GHK-ko buru, eta bere taldea ez dira gai elkarrizketarako ez akordiorako eta legea betetzeari uko egiten diote, intsumisio eta guzti. Horrexek ekarri du oraingo egoera.

8.- Ondorioa: arazoa Aldundi honek sortu du, Bilduk gobernatua eta Ezker Abertzaleak gidatua, eta azpikeriaz eta nahita ez du betetzen indarrean dagoen araudia, beldurra eraginez eta liskarra jarriz. Azken batean, haustura-bide handia ari da bilakatzen Gipuzkoarako, izan ere enpresei eta finantza-erakundeei mesfidati izateko motiboak ematen dizkie, jokabide demokratikoak urratu eta bere erabakiak inposatzen ditu, errealitatea gezurraren eta propaganda sistematikoaren bidez manipulatzen du eta diru-galerak ekartzen dizkie Gipuzkoako herritarrei.