EAJ-PNV-K BILDU-RI ESKATU DIO, GIPUZKOA EZ HONDORATZEKO HONDAKINEN KUDEAKETAN

Xabier Ezeizabarrena batzarkide jeltzaleak salatu du, Bilduk ez duela ez araudia betetzen, ez Batzar Nagusietako gehiengoaren adostasunak aintzat hartzen”. 

Zubietako errausketa-instalazioaren enpresa eraikitzaileek Gipuzkoako Hondakinen Partzuergoari gutuna bidali dio. Horren harira, Gipuzkoako Batzar Nagusietako EAJ-PNVren batzarkide taldeak Bilduren aginteko Foru Aldundiari eskatu dio, Gipuzkoa ez hondoratzeko hondakinen kudeaketan. Horrenbestez, jeltzaleen batzarkide taldeak Iñaki Errazkin Ingurumeneko eta Lurralde Antolaketako foru diputatuari eskatuko dio Batzar Nagusietan agertzeko eta, bertan, Foru Aldundiaren iritzia emateaz gain, aldundiaren beraren erantzuna azaltzeko, foru arauan aurreikusitako azpiegiturak gelditu izanaren gainean.

Xabier Ezeizabarrena batzarkide jeltzaleak esan duenez, Bildu ez da gai izan inorekin ados jartzeko. Ildo beretik, Ezeizabarrenak honakoa azpimarratu du: “Dagoeneko, errausketa-instalazioaren enpresa eraikitzaileek Juan Carlos Alduntzin GHK-ko presidenteari ultimatum-a egin diote. Baina aitzitik, Alduntzinek nahiago du Gipuzkoa hondoratu, Gipuzkoako Batzar Nagusietako gehiengoarekin ados jartzea eta hondakinen arazoa konpontzea baino”.   

Era berean, EAJ-PNVren hautetsiak Bilduri segidakoa gogoratu dio: “Erabaki bakoitzak bere ondorioa du. Bildu araudiaren eta legeak agindutako kontratuen aurka dago eta jarrera horrek bere ondorioak ditu”. Horrenbestez, Xabier Ezeizabarrenak Juan Carlos Alduntzini eskatu dio, azaltzeko gipuzkoako herritarrei Foru Aldundiak hainbat milioi euro ordaindu beharko dituela errausketa-instalazioa ez eraikitzeagatik.

Halaber, Ezeizabarrenak Bilduri ohartarazi dio, Bildu bera izango dela ezer ere ez egitearen erantzule. Hau da, Bildu berea ez den beste edozein proiekturen aurka dago eta horien izen ona kaltetzen saiatzen da, bere kudeaketarako gaitasun eza ezkutatzeko”.

Azkenik, EAJ-PNVren batzarkideak honakoa salatu du: “Bilduk ez du ez araudia betetzen, ez Batzar Nagusietako gehiengoaren adostasunak aintzat hartzen”. Hori dela eta, Foru Aldundiari eskatu dio, argitzeko zergatik gelditu dituen Zubietako energia-balorizazio plantaren lanak eta zer gertatuko den lan horiek egiteko adostutako diruarekin. Amaitzeko Xabier Ezeizabarrenak Ezker Abertzaleari honakoa galdetu dio: “Zergatik inposatu nahi du Ezker Abertzaleak bere proiektu totalitarioa?”.