21 de marzo de 2013

EAJ-PNV-K BILDUREN GAITASUN FALTA SALATU DU ERREPIDEEN FINANTZIAZIOA KUDEATZEKO



Jeltzaleen batzarkide taldearen bozeramaile Markel Olanok honakoa esan du: “Bilduk ez die kobratu nahi Gipuzkoatik pastasen diren kamioiei eta, ondorioz, gipuzkoarrok errepideen mantentze lanak ordaintzen ditugu”. 



Mugikortasun eta Bide Azpiegituretako foru diputatu Larraitz Ugartek aste honetan iragarri du, hirugarren aldiz errepideak finantziatzeko Foru Aldundiaren proposamenaren aurkezpena atzeratu duela. Horren harira, EAJ-PNVren batzarkide Aintzane Oiarbideren ustez, “onartezina da proposamenaren aurkezpena berriro atzeratzea” eta, horrenbestez, honakoa salatu du: “Bilduk ez du gaitasunik errepideen finantziazioaren gaia kudeatzeko eta, ondorioz, errespetua galdu die Batzar Nagusiei, alderdi politikoei eta Gipuzkoako garraiolariei, izan ere, azken horiek Foru Aldundiak egingo duenaren zain jarraitzen dute”.

Era berean, Aintzane Oirabidek azaldu duenez, lehengo legealdian adostu zen kamioientzako Etxegarateko bidesaria 2012ko urtarrilaren lehenean martxan egongo zela. Hau da, 15 hilabete pasa dira eta Foru Aldundiak ez du, oraindik, bidesaririk jarri eta, ondorioz, Gipuzkoako diru-kutxak ez ditu hamarkada milioi euro jaso, errepideen mantentze lanak finantziatzeko”.

Ildo beretik, batzarkide jeltzalearen iritziz, Gipuzkoatik igarotzen diren kamioiek arriskua sortzen dute, asko kutsatzen dute eta, gainera, errepideak hondatzen dituzte. Hala ere, Bilduk ez die ordaindu arazi nahi eta, horregatik, egun, errepideen mantentze lanak finantziatzen dira, gipuzkoarrok ordaintzen ditugun zergekin”. Horregatik guztiagatik, Aintzane Oiarbidek azpimarratu du, Gipuzkoako herritar gehienak Gipuzkoako errepideetatik igarotzen diren kamioiek ordaindu araztearen alde daudela.  

Halaber, Oiarbidek segidakoa gogoratu du: “EAJ-PNV Gipuzkoako kamioilariei zerga-hobariak ematearen alde dago; izan ere hala adostu zen lehengo legealdiko talde txostengilean – hain zuzen ere, orain arte gai honetan adostasun handiena lortu duena –“. Horrenbestez, hautetsi jeltzalearen ustez, Bilduren aginteko Foru Aldundia nahastuta dabil eta bere irizpide falta oso larria da. Hau da, Bilduren aitzakia, orain, bere proposamenaren aurkezpena atzeratzeko honakoa da: Europari galdegin dio eta erantzunaren zain dago. Baina bitartean, ez da gai izan gainerako alderdiekin ezer ere ez adosteko. Horren ondorioz, trafikoak ordenatu gabe jarraitzen du eta, horrek, N-I errepidea bezalako bideek arriskutsuak izaten jarraitzen dute. Hori dela eta, Oiarbideren aburuz, baldin eta Foru Aldundiak Etxegaraten kamioentzako bidesaria jartzen badu, diru-bilketa handiagoa izango luke eta, beraz, gipuzkoarrok ez genituzke gure poltsikotik errepideen mantentze lanak ordainduko.

Azkenik, hona hemen EAJ-PNVren batzarkidearen hitzak: “Bilduren aginteko Foru Aldundiari eskatu diogu, herritarren eskaria aintzat hartzeko eta lehenbailehen Gipuzkoatik igarotzen diren kamioiei ordaindu arazteko”.

No hay comentarios:

Publicar un comentario