MARKEL OLANO: “LANGABEZI-TASAK GORA EGIN DU ETA, BITARTEAN, BILDUK FORU ALDUNDIAN KRISIARI AURRE EGITEKO PLANIK EGIN GABE JARRAITZEN DU”.

Jeltzaleen batzarkide taldearen bozeramaileak esan du, EAJ-PNVk jarraitzen duela krisiari aurre egiteko foru arau proposamena lantzen Gipuzkoako ekonomiaren eta gizartearen eragileekin.  

Radio Nacional de España irratiko Radio 5 Gipuzkoa irratsaioan EAJ-PNV batzarkide taldearen bozeramaile Markel Olano elkarrizketatu dute gaur goizean. Gipuzkoako Langabeziaren datuak izan dira  elkarrizketaren ardatzetako bat. Markel Olanok honakoa gogoratu du: “Gure herrian, 90.hamarkadako krisiari aurre egiteko, EAJ-PNVk erakundeen eta gizartearen eragileen arteko akordioa lortu zuen, lurraldearen industria eta ekonomia bultzatzeko eta, horrenbeste, krisialdia gainditzeko”.

Horren harira, Olanoren iritziz, “lanean hasteko garaia dugu. Politikariei eta erakundeei buruz asko hitz egin da azkeneko boladan, baina herritarrek gauza bat izan behar dute argi, alegia, Gipuzkoak krisi egoera larria bizi duela. Era berean, nahiz eta Espainiaren egoera baino hobea izan, langabeziaren datuak kontuan hartuta, industriaren langabezi-tasa handiak argi uzten du Gipuzkoako enpresek egoera zaila bizi dutela”. Hori dela eta, jeltzaleen batzarkide taldearen bozeramailearen ustez, “esfortzu handi bat egiteko garaia da. Ideiak zehaztu behar ditugu, alderdikeriaz jokatzeari utzi behar diogu eta ikuspegi bateratua izan behar dugu krisiari aurre egiteko”.

Horrenbestez, Markel Olanok EAJ-PNVren ekonomia sustatzeko planari buruz hitz egin du, eta plana egiteko berandu ez ote den galdetu diote: “Oposizioak Martin Garitano diputatu nagusiari eskatu zion 2012ko otsaila baino lehen hitzarmen mahia osatzeko, 2012ko ekainean krisiari aurre egiteko plana egiteko. Alabaina, Bilduk ez du eskatutakoa bete, are gehiago: Martin Garitanok berak esan zuen ez zuela krisiari aurre egiteko planik egingo ‘ez zutelako ezertarako balio’”.  

Horren ondorioz, EAJ-PNVren eledunak salatu du, Bilduren aginteko Foru Aldundia ez dela egoeraren jabe, edo egoeraz jabetze bada, ez dela hura konpontzeko ezer egiten ari. Hori dela eta, EAJ-PNVk proposamena egin du Foru Aldundia behartzeko krisiari aurre egiteko plana egitera. Jakina, lehenik Batzar Nagusien gehiengoaren babesa lortu behar dugu eta hori da, hain zuzen, lantzen ari garena. Beraz, Bilduk foru arau hori bete beharko du, nahiz eta hondakinen gaia aurrekaritzat dugun. Gogoan izan, Bildu ez dela legea betetzen ari”.  

Era berean, hondakinen kudeaketaren gainean galdetu diote Markel Olano jeltzaleari: “Bilduk argi utzi du ez duela beteko Gipuzkoako Hiri Hondakinen Kudeaketarako Plangintza Orokorra (PIGRUG) arautzen duen Foru Araua eta, beraz, ez dituela egingo bertan zehazten diren azpiegiturak. Dena dela, Bilduk ez du bestelako planik proposatu eta, bakarrik, hondakinak jasotzeko eredua inposatzen ari da, betiere, gehiengo absolutua duen herrietan. Hau da, Bilduk gai garrantzitsu honi konponbiderik aurkitu gabe jarraitzen du, eta baldin eta Bilduk hain kudeaketa kaxkarra egiten jarraitzen badu, Gipuzkoako hiri zein hirietan zaborra eta zikinkeria pilatzen hasiko da eta osasungarritasunari kalte egingo dio”.   

Lehengo astean Bidegin izandako istiluari buruz, Gipuzkoako Batzar Nagusietako EAJ-PNVren bozeramaileak segidakoa esan du: “Bi urte pasa dira Euskal Autonomia Erkidegoko hauteskundeak izan zirenetik eta ezker abertzalea fakturei buruz hitz egiten ari da, dagokiona kudeatu ordez. Hau da, ezker abertzaleak boterea nahierara erabiltzen du arerio politikoaren aurka egiteko. Baina, gehien arduratzen nauena honakoa da: ezker abertzaleak arerio politikoa etsai bihurtzen du. Horren arrazoia da, Bildu eta EAJ-PNVren arteko boto aldea Gipuzkoan berdinketarainokoa izatera pasa dela”. 

Horrenbestez, Markel Olanok ezker abertzaleari eskatu dio, herritarrak konbentzitzeko bere eredua EAJ-PNVrena baino hobea dela, eta ez erabiltzeko boterea nahierara etsaia suntsitzeko. Baldin eta irregulartasunik badago, epaitegietan salaketa jarri beharko du, eta EAJ-PNVk neurriak hartuko ditu eta ez du tolerantziarik izango, beste hainbat alditan gertatu izan den bezala. Dena den, ezker abertzalearen estrategiak erakundeen ospe onari eta politikarien izen onari egiten die kalte”. 

Azekinik, Olanok Gipuzkoako proiektu estrategikoak izan ditu hizpide: “Murrizketak Euskadiko hiru Lurralde Historikoetan izango dira eta hiruretan lehentasunak ezarriko dira. Beraz, ez da egokia esatea murrizketa horiek bakarrik Gipuzkoan egingo direla”. Hortaz, EAJ-PNVren batzarkide taldearen eledunak Donostia-beterriko metroaren proiektuari buruz segidakoa esan du: “Lehengo legealdiko Eusko Jaurlaritzaren proiektuaren garapena ez zen egokia; izan ere, ez zuen ez aurrekonturik ez konpromiso-krediturik. Beraz, egoera bere onera itzuli beharko da, betiere, kontuan izanda EAJ-PNVk babestu duena, hau da, Metroa Donostia zeharkatu behar duela. Beste azpiegituretan, berriz, lehentasunak ezarri beharko ditugu, baina ez ditugu baztertuko Gipuzkoaren garapenerako garrantzitsuak direnak, baina, betiere, Eusko Jaurlaritzarekin elkarlanean”.