EAJ-PNV-K FORU ALDUNDIARI ESKATU DIO GARDENA IZATEKO ETA BATZARKIDE TALDEEK ESKATUTAKO INFORMAZIOA EMATEKO

Xabier Ezeizabarrena batzarkidearen ustez, Foru Aldundiak ez ditu gainerako batzarkide taldeen galderak erantzun eta, beraz, ez da gardena izaten ari.

Bilduren aginteko Foru Aldundiak ez ditu gainerako batzarkide taldeen galderak erantzuten eta, beraz, EAJ-PNVk Foru Aldundiari eskatu dio gardena izateko eta ez oztopatzeko batzarkide taldeek informazioa eskuratzeko duten eskubidea. Horren harira, Xabier Ezeizabarrena batzarkide jeltzaleak honakoa esan du: “Bilduren aginteko Foru Aldundiak ez die batzarkide taldeei erantzuten bere kudeaketari buruz egindako galderei”. 

Era berean, Ezeizabarrenaren ustez, legealdiaren hasieratik batzarkide taldeek Batzar Nagusietako mahaiari babesa eskatzeko hainbat helegite egin behar izan diote, izan ere Foru Aldundiak ez ditu egindako galderak erantzuten. Hori dela eta, EAJ-PNVren batzarkideak salatu du, Foru Aldundiak errespetua galdu diela batzarkide taldeei eta ez dela gardena izaten ari; izan ere, ez die informaziorik ematen batzarkide taldeei.

Horrenbestez, hondakinen kudeaketari buruz, Xabier Ezeizabarrenak segidakoa gogoratu du: “Foru Aldundiak zabortegi berriak egingo zituela esan zuen eta, ondorioz, EAJ-PNVk Foru Aldundiari galdetu zion, plangintzarekin aurrera jarraitzeko asmoa zuenentz, eta eskatu zion argitzeko egonkortutako hondakin-fardelak botatzeko guneen kokapena. Galdera urtarrilean egin zuen EAJ-PNVk eta Bilduk ez dio, oraindik, erantzunik eman”.   

Halaber, Ezeizabarrenak segidakoa azaldu du: “Ingurumeneko foru diputatu Iñaki Errazkinek ez ditu argitu Janez Potocnik Europar Batasuneko Ingurumeneko komisarioarekin izandako iritzi ika-mika, hondakin hondarraren tratamenduari eta errausketa-instalazioaren eraikuntzari buruz. Orduan, Errazkinek esan zuen Europar Batasunak Foru Aldundiaren tesiak babesten zituela. Baina aitzitik, errealitatea bestelakoa da, izan ere, Potocknik komisarioaren iritis, hondakin-hondarra erraustea eraginkorra eta segurua da eta, gainera, gizartearentzako onurak izango ditu, betiere, energia eta beroa sortuko dituelako eta baliabideak berreskuratuko direlako”.

Ildo beretik, EAJ-PNVren batzarkideak honakoa esan du: “Ingurumeneko Europar Batasuneko komisarioaren hitzek argi utzi zuten errausketa-instalazioa ez dela kaltegarria pertsonentzat – gogoan izan, Janez Potocknikek honakoa esan zuela: “Europar Batasunean dauden errausketa-instalazioak baldintza bereziak bete behar dituzte eta baldintza horien helburua da, ingurumena eta Osasuna babestea –. Beraz, ez ditugu Bilduren arrazoiak ulertzen, errausketa-instalazioa kaltegarria dela esateko eta, ondorioz, herritarrak beldurtzeko”.

Dena den, Foru Aldundiak ez du informaziorik eman eta ez ditu erantzun beste hainbat gairi buruzko galderak, besteak beste, bide azpiegiturei buruzkoak, herritarren parte-hartzeari buruzkoak edo erakundearen antolaketari buruzkoak. Xabier Ezeizabarrenak azaldu duenez, EAJ-PNVk Foru Aldundiari honako gaien gaineko galderak egin ditu: 1) Bidegik finantza-erakundeekiko zorrari buruz; 2) Diputatu Nagusiaren Kabinetearen diru-laguntzei buruz, Gipuzkoako Udaletan parte-hartzea bultzatzeko; 3) Diputatu Nagusiaren Kabineteak gizonen eta emakumeen arteko berdintasuna bultzatzeko jarduerei diru-laguntzeari buruz; eta 4) Diputatu Nagusiaren Kabinetearen behin behineko lan-taldeari buruz.

Azkenik, Xabier Ezeizabarrenak Bilduren aginteko Foru Aldundiari gogorarazi dio, ez dela inoiz gertatu izan Foru Aldundiak batzarkide taldeei erantzun ez izana eta, era berean, Foru Aldundia behartuta dagoela batzarkide taldeen galderei erantzutea.