EAJ-PNV-K SALATU DU, BILDU EZ DELA GAI IZAN MUGI TXARTELA EGOKI EZARZTEKO ETA, ONDORIOZ, ERRUA EUSKO JAURLARITZARI EGOTZI DIOLA

Joseba Antxustegi batzarkide jeltzalearen iritziz, Bilduk ez du prozedura egokia egin Mugi txartela ezartzeko. Izan ere, ez du aurreikuspenik izan eta ez da gai izan prozesua kudeatzeko, eta, ondorioz, Mugi txartela ezartzea kaos bat izan da. 

Larraitz Ugarte Mugikortasun eta Bide Azpiegituretako foru diputatua Gipuzkoako Batzar Nagusietan agertu da Mugi txartelaren ezartzeari buruz azalpenak emateko. EAJ-PNVren batzarkide Joseba Antxustegik kritikatu du, prozesua ez dela egokia izan; izan ere, Foru Aldundiak ez du aurreikuspenik izan eta prozesua kudeatzeko ez da gai izan. Ondorioz, ezartze-prozesua kaos bat izan da. Antxustegiren ustez, Larraitz Ugarte Mugikortasuneko foru diputatuak uneoro protagonista izan nahi du eta, horretarako, Mugi txartelaren prozesua azkartu nahi izan zuen. Horren ondorioz, prozesua okertu da eta erabiltzaileak kaltetu ditu; izan ere, ez dute txartela garaiz jaso eta ohiko tarifa ordaindu behar izan dute.

Era berean, EAJ-PNVren batzarkideak honakoa salatu du: “Foru Aldundia ez da gai izan gaia kudeatzeko eta, ondorioz, Eusko Jaurlaritzari errua egotzi dio. Hala ere, gogoratu behar da, 2012an Foru Aldundiak eta alderdi sozialistaren aginteko Eusko Jaurlaritzak sinatu zutela hitzarmena, PSEren aginteko gobernua funtzioetan zegoela. EAJ-PNV agintera iritsi zenean gaia geldi zegoen, nahiz eta, orain, Bilduk eta PSEk kontrakoa irudikatu nahi duten”. 

Halaber, Antxustegik segidakoa esan du: “Foru Aldundiak oso azkar ezarri nahi izan du tarifa bakarra, pentsatu eta hausnartu gabe, eta presak sortu du kaosa erabiltzaileen artean. Hau da, Bilduren aginteko foru aldundiak ez du hausnarketarik egin aurretik eta, ondorioz, orain, ezin izan die eskaera guztiei erantzun eta, beraz, hainbat erabiltzaile ohiko txartela ordaintzen ari dira eta zenbait talde beherapenetatik kanpo gelditu dira”.  

Azkenik, EAJ-PNVren hautetsiak honakoa gogoratu du: “Garraio publikoaren alde egin duen alderdi bakara EAJ-PNV izan da. Izan ere, txartel bakarra egin zuen, tarifa bakarra ezartzeko dena prest utzi zuen eta, orain, Bilduk dena hankaz gora jarri du”.