EAJ-PNV-K SALATU DU, LARRAITZ UGARTEK ARRAZOI FALTSUAK ERABILI DITUELA BIDELANEN KONTRATUA KALTEGARRIA DELA JUSTIFIKATZEKO

Aintzane Oiarbide batzarkide jeltzalearen iritziz, Larraitz Ugarteren erabakia politikoa da eta Bilduren estrategiari eusten dio, hain zuzen ere, liskarra bilatzeko eta guztia epaitegietara eramateko estrategiari. 

Larraitz Ugarte Mugikortasun eta Bide Azpiegituretako foru diputatua Batzar Nagusietan agertu da gaur arratsaldean. Bertan, azaldu du Diputatuen Kontseiluaren 2013ko ekainaren 11ko erabakia, non eta Foru Aldundiak Bidelanen kontratua kaltegarritzat jotzeko prozedurari hasiera eman zion, izan ere, Foru Aldundiaren ustez, kontratua gipuzkoarren interesen aurkakoa da. Horren harira, Aintzane Oiarbide EAJ-PNVren batzarkideak honakoa salatu du: “Foru Aldundiak ez die batzarkide taldeei prozedurari buruzko informaziorik eman. Orduan, espedientea bidaltzeko eskatu genion Mugikortasun eta Bide Azpiegituretako foru diputatuari, baina ezetz erantzun zigun, ebatzita ez zegoelako”. Ildo beretik, Oiarbidek Larraitz Ugarteri ekonomia- eta justizia-txostenaren kopia eskatu dio, izan ere, bertan, kontratua kaltegarritzat jotzeko prozedura martxan jartzeko arrazoiak daude.

Horrenbestez, EAJ-PNVren batzarkidearen iritziz, Larraitz Ugartek arrazoi faltsuak erabili ditu Bidelanen kontratua kaltegarria dela justifikatzeko eta, beraz, erabaki politiko baten aurrean gaude. Izan ere, Herri-Kontuen Euskal Epaitegiak ere honakoa gertutatu du: ez da egia Bidelanek zenbat eta gehiago gastatu, orduan eta gehiago irabazten duen. Hortaz, Aintzane Oiarbidek azaldu du, Bidegin mantentze-lanen gaineko aurrekontuaren aldaketak onartzen direnean (KPI, soldatak, erregaiaren salneurria, elektrizitatea…), aldaketa horiek esleipenaren jabeak, hau da, Bidelanek, hartzen ditu bere gain. 

Hori dela eta, Oiarbidek salatu du, Larraitz Ugartek bakarrik liskarra nahi duela EAJ-PNVrekin, eta honaoka kritikatu du: “Ugarte Mugikortasun eta Bide Azpiegituretako foru diputatuak egindakoa kaltetu du eta guztia justiziaren aurrera eraman du, ondorioak zein nahi diren ere. Eta ondorio horiek ekonomikoak ere dira, izan ere, zentzurik gabeko epaiketak ordaintzen dira eta kalte-ordainak datorren legealdiko kudeatzaileek kudeatu beharko dituzte eta gipuzkoarrok ordainduko ditugu”.

Era berean, jeltzaleen batzarkideak segidakoa gogoratu du: “Bidegin hartutako erabakiek alderdi politikoen babesa izan dituzte, batzuetan aho batez eta, beste batzuetan, abstentzioren batekin”.

Aintzane Oiarbidek, halaber, esan du, gauza asko egin direla Gipuzkoan alderdi guztien arteko elkarlanari esker, besteak beste, bigarren saihesbidea edo AP-1 errepidea. Baina orain, batzarkide jeltzalearen iritziz, Larraitz Ugartek nahiago du alderdien arteko adostasunik ez egotea.

Azkenik, hona hemen Oiarbideren hitzak: “Errepideen mantentze-lanak Bidegik egin ditu Bidelan-en bidez eta, gainera, oso ondo egin ditu. Beraz, ulergaitza da Larraitz Ugartek, orain, Bidelanen kontratua kaltegarritzat jotzea, izan ere, erabili dituen arraoiak oinarri sendorik gabekoak eta faltsuak dira”.