25 de septiembre de 2013

MARKEL OLANO: “BILDUK GAITZESPENA MEREZI DU EKONOMIAN ETA, HALABER, BATZAR NAGUSIEK BILDU FORU ARAU BATEN BIDEZ DERRIGORTZEA KRISIARI AURRE EGITEKO PLANA EGITERA”

EAJ-PNV-ren batzarkide taldearen bozeramailearen ustez Bilduren aginteko Foru Aldundiaren jarrera hotza eta neurririk gabekoa da, eta honakoa ohartarazi dio: “EAJ-PNVk lan egingo du Ekonomia Sustatzeko Foru Araua egiteko proposamena egiteko”.


Krisia eta Gipuzkoako ekonomiaren egoera izan dira gaurko gai nagusiak Gipuzkoako Batzar Nagusietako ohiko osoko bilkuran. PSE-EE-ren batzarkide taldeak azken unean erabaki du eguneko gai-zerrendatik kentzea Jon Uriguen Berrikuntzako, Landa Garapeneko eta Turismoko foru diputatuaren lana gaitzesteko gaia. Horren harira, EAJ-PNV batzarkide taldearen bozeramaile Markel Olanok honakoa esan du: “Erabakia errespetatzen dugu, baina guk bestelako analisia egiten dugu: Bilduren aginteko Foru Aldundiak Batzar Nagusien gaitzespena merezi du ekonomian, izan ere, kudeaketa txarra egiten ari da eta behin eta berriro ezetz esan dio Gipuzkoan krisiari aurre egiteko planak egiteari”. 

Horiek horrela, Olanok gogoratu du, Bilduk ez zuen proposatu krisiari aurre egiteko edota ekonomia-sustatzeko aurrekontu-sailik 2012rako eta 2013rako aurrekontu-proposamenean. Beraz, oposizioko alderdiek – horren gaineko zuzenketak adostu zituzten – Bildu derrigortu zuten aurrekontuan krisiari aurre egiteko aurrekontu-sailak egitera. Horrenbestez, EAJ-PNVren bozeramaileak segidakoa salatu du: “Bilduren aginteko Foru Aldundiak neurririk proposatu gabe jarraitzen du krisiari aurre egiteko eta, hori, oso larria da Gipuzkoarentzat. Izan ere, krisialdia hasi zenetik bost urte igaro dira eta Bilduren aginteko Foru Aldundiak ez du oraindik plangintza zorrotzik egin krisiari aurre egiteko”. 

Era berean, Markel Olanok esan du, onartezina dela Bilduk, oraindik, ezer egin ez izana, eta honakoa gaineratu du: “Bilduren aginteko Foru Aldundiaren jarrera hotza eta neurririk gabekoa da ekonomian”. Horiek horrela, Olanok gogoratu du, duela hainbat aste ezagutu zutela 2012ko Kontu Orokorra. Bertan, besteak beste, honakoa ezagutzeko aukera izan zuten: Berrikuntzako, Landa Garapeneko eta Turismoko departamentuaren aurrekontuaren betetze-maila 2012an %88,24 izan da; alegia, betetze-maila eskasa, Gizarte Politikako – betetze-maila %99,37 – edota Ogasun eta Finantzetako – %98 – departamentuen betetze-mailarekin alderatuta. Beraz, datu horrek agerian uzten du Bilduk ez duela ezer egin arlo horretan.

Olanok, halaber, honakoa adierazi du: “Nahiz eta PSEk Jon Uriguen foru diputatuaren lana gaitzesteko ekimena bertan behera utzi duen, EAJ-PNVk beste ekimen batzuk egiten jarraituko du: hain zuzen ere, ekimen horien artean, Ekonomia Sustatzeko Foru Araua dago. EAJ-PNV Oposizioko gainerako taldeekin hitz egiten ari da, izan ere, jeltzaleon ustez, Foru Arau baten bidez behartu behar dugu krisiari aurre egiteko planak egitera, bere ekonomiaren kudeaketa oso txarra baita”. 


Azkenik, hona hemen EAJ-PNVren eledunaren hitzak: “EAJ-PNVk Bilduren aginteko Foru Aldundiari bi gauza eskatzen jarraituko dizkio: alde batetik, ekonomia sustatzeko plana egiteko eta, bestetik, Gipuzkoako ekonomiaren eragileekin – hau da, sindikatuekin, enpresa gizon/emakumeekin, merkataritza-ordezkariekin –eta – elkarlanean aritzeko, ekonomiaren egoerari buruzko hausnarketa egiteko”. Markel Olanoren iritziz, Foru Aldundiaren eta ekonomiaren eragileen arteko hausnarketa ezinbestekoa da, Gipuzkoako ekonomia-lehentasunak ezartzeko. Beraz, EAJ-PNVk Foru Aldundiari egindako eskaerak mantenduko ditu, baldin eta Foru Aldundiak eskatutakoa bete gabe jarraitzen badu.   

No hay comentarios:

Publicar un comentario