EAJ-PNV-K FORU ALDUNDIARI ESKATU DIO, MALGUA IZATEKO ETA ADOSTEKO DEFIZITAREN BANAKETAREN 18 MILIOI EUROKO INBERTSIOAK

Jeltzaleen batzarkide taldearen bozeramaile Markel Olanok azpimarratu du Gipuzkoak biztanleak modu orekatuan banatuta izatearen garrantzia, hain zuzen, enpresa indartsuak dituzten bailara indartsuak izatearen garrantzia, bermatzeko Gipuzkoako lehiakortasuna etorkizunean.

Ogasuneko eta Finantzetako foru diputatu Helena Franco Batzar Nagusietan agertu da gaur goizean eta, bertan, aurkeztu du inbertsioetarako 18 milioi euroak banatzeko Bilduren aginteko Foru Aldundiaren proposamena – gogoan izan, Eusko Jaurlaritzak eta Bizkaiko, Arabako eta Gipuzkoako foru aldundiek Herri Dirubideen Euskal Kontseiluan adostu zutela defizita banatzea inbertsioak egiteko –. EAJ-PNV batzarkide taldearen bozeramailearen iritziz, oso garrantzitsua da diru-kopuru hori izatea, kontuan izanda Gipuzkoako ekonomia-egoera: “Egia da 18 milioi euro horiek ez dituztela Gipuzkoako arazo guztiak konponduko, baina Eusko Jaurlaritzaren lanari esker eta foru aldundiekin lortutako adostasunari esker, Gipuzkoako ekonomia bultzatu ahal izango dugu”.

Era berean, Olanok honakoa esan du: “Foru Aldundiak 18 milioi euro horiek banatzeko bere proposamena gainerako batzarkide taldeoi helarazi zigunetik – bertan, Foru Aldundiak proposatzen zuen 6 milioi euro udalen inbertsioentzat izatea – jakin bagenekien udaletako inbertsioetarako 6 milioi horien gainean eztabaida piztuko zela”. Horren harira, Markel Olanok segidakoa adierazi du: “Legealdia hasi zenean Bilduri kritikatu genion Landa Gipuzkoa 32 programa bertan behera utzi izana – gogoan izan, Landa Gipuzkoa 32 programaren helburua honakoa zela: 1000 biztanle baino gutxiagoko herriei inbertsioak egiten laguntzea –. Hori dela eta, EAJ-PNVren ustez, egokia da 18 milioi euro horietatik 6 milioi euro herri txikien inbertsioetara bideratzea, batez ere, kontuan izanda Foru Aldundiak, era berean, diru-lerroak proposatu dituela hainbat herrigunetako zein hirugunetako azpiegiturentzat – esaterako, Arteleku, Albaola edo Errenteriako Dantzagunea –. 

Jeltzaleen batzarkide taldearen bozeramaileak, halaber, honakoa gaineratu du: “Egokia da Foru Aldundiak proposatutako banaketa, baina, oraindik, badago zer adostu”. Hortaz, Bilduren aginteko Foru Aldundiari eskatu dio, malgua izateko eta lurraldearen orekarentzako akordio onuragarria adosteko. Horrenbestez, Markel Olanok segidakoa azpimarratu du: “Oso garrantzitsua da Gipuzkoak biztanleak modu orekatu batean banatuta izatea eta, hain zuzen ere, enpresa indartsuak dituzten bailara indartsuak izatea; izan ere, banaketa orekatu horrek bermatuko du Gipuzkoako lehiakortasuna etorkizunean”.

Azkenik, Olanoren ustez, Eusko Jaurlaritzak defizitaren banaketa zuzena egin du, eta, ondorioz, Bilduren aginteko Foru Aldundiari eta gainerako alderdiei honakoa eskatu die: “Malguak izateko adostasuna lortzeko eta, ondorioz, Gipuzkoako bailarei garrantzia emateko inbertsioak banatzeko. Izan ere, bailara guztietan Gipuzkoaraentzako proiektu garrantzitsuak daude”.