EAJ-PNV-K EKIMENAK EGINGO DITU KRISIARI AURRE EGITEKO ETA EKONOMIA SUSTATZEKO.

Jeltzaleen batzarkide taldearen bozeramaile Markel Olanok salatu du, Bilduk PIGRUG hondakinen plangintzaren inbertsioak egin gabe jarraituko duela eta, gainera, hondakinak tratatzeko azken faserako beste plangintzarik izan gabe jarraitzen duela. 

Gipuzkoako Foru Aldundiaren 2014.urterako aurrekontuak beste izapide bat pasa du gaur Gipuzkoako Batzar Nagusietan. Izan ere, foru diputatu guztiek azaldu dute banan bana euren arloetako aurrekontua eta batzarkideen galderei zein zalantzei erantzun diete. EAJ-PNV batzarkide taldearen bozeramaile Markel Olanoren ustez, Bilduren aginteko Foru Aldundiak ez du ez proiektu ez ideia zehatzik ekonomia sustatzeko: “Diputatu nagusi Martin Garitanok eta Berrikuntzako, Landa Garapeneko eta Turismoko foru diputatu Jon Uriguenek ez dute aurkeztu krisiari aurre egiteko neurririk. Beraz, EAJ-PNVk aurrekontuei zuzenketa egingo die eta ekimenak egingo ditu Gipuzkoan krisiari aurre egiteko eta ekonomia sustatzeko”.

Horren harira, Olanok segidakoa esan du: “EAJ-PNVk arlo honetan aurrekontuari zuzenketak egingo dizkio, izan ere, gipuzkoarron kezkarik nagusiena da krisiari aurre egitea, ekonomia sustatzea eta enplegua sortzea. Gainera, bai langileen bai enpresaburuen iritziz, Bilduren aginteko Foru Aldundiak ez du kontuan hartzen gipuzkoarron kezka eta arazo nagusiena, hain zuzen ere, krisia eta enplegua. Hortaz, Markel Olanoren ustez, Foru Aldundiak ez du lidergorik krisiari aurre egiteko: “Oso garrantzitsua da erakunde batek aurrekontua izatea egoera zailari aurre egiteko; baina aitzitik, Bilduk ez du ez ekimenik, ez planik egin Gipuzkoako egoera zailari aurre egiteko”.  

Era berean, jeltzaleen batzarkide taldearen bozeramaileak Bilduren aginteko Foru Aldundiaren kudeaketa beste hainbat arlotan ere kritikatu du: “Esaterako, hondakinen kudeaketan Bilduk berdin jarraitzen du. Ez ditu egingo PIGRUG hondakinen plangintzan aurreikusitako inbertsioak – gogoan izan, PIGRUG plangintza dela gipuzkoar gehienen oniritzia duen plangintza –. Bilduk egiten duen gauza bakarra da inposatzea eta pentsatu gabeko erabakiak hartzea eta, ondorioz, hondakinen kudeaketa kaos bat da”. Horrenbestez, EAJ-PNVren batzarkideak salatu du, Bilduk beste plangintzarik izan gabe jarraitzen duela hondakinak tratatzeko azken faseari ekiteko. Hau da, Bilduk errausketa-instalazioa gelditu du, baina ez du beste proposamenik egin.

Halaber, jeltzaleen eledunak, gizarte politiken aurrekontuaren gainean mintzatu da: “Bilduk ez du egin ez plangintzarik, ez ekimenik, gizarte politiken gastua mantentzeko. Gainera, Gizarte Politikako departamentuaren aurrekontuak, besteak beste, segidako gabeziak ditu: zaharren egoitzetan plaza berri gutxi dago; ez du inbertsiorik egin zaharren egoitzetan plaza berriak egiteko; eta ez du hitzarmen berririk egin zahar-egoitza berriak hitzartzeko”. Gainera, Markel Olanok salatu du, Foru Aldundiak ez duela neurririk hartu itxaron zerrendak gutxitzeko eta, era berean, berririk ez dagoela inbertsioak egiteko atalean.

Bestalde, EAJ-PNV batzarkide taldearen bozeramaileari kezka sortu dio Bilduren hitzaldia: “Bilduren ustez, politikarik egokiena da ‘gizarte politikako gastuan inbertsioak egiten duen politika’”. Baina aitzitik, Markel Olanoren ustez, politika horrek ez du aberastasuna eta enplegua sortzen. Egoera zaila duten herritarrei lagundu behar zaie eta pobrezia erauzi behar da, eta, horretarako, ezinbestekoa da enplegua sortzea. Olanoren iritziz, EAJ-PNVri kezkatzen dio Foru Aldundiaren ekonomia-plangintzaren oinarria izatea mendekotasunaren gaineko diru-laguntak; izan ere, diru-laguntza horiek gehienez 833,96 eurokoak dira eta Donostia edo Azpeitia bezalako hiriguneetan agerian gelditu da diru-laguntza horiek ez direla garatu beharreko politikak. 

Azkenik, Olanok iragarkietarako aurrekontu-sailari buruz hitz egin du eta honakoa salatu du: “Iragarkiak eta ikerketak egiteko aurrekontu-sailak neurriz kanpokoak dira. Izan ere, Foru Aldundiak denbora luzea galtzen ari da ikerketak egiten eta, ondorioz, ez ditu martxan jarri aurreikusitako hainbat ekimen zein plangintza”.