EAJ-PNV-K IÑAKI ERRAKINI LEPORATU DIO BILDUREN INTERESAK LEHENTSI IZANA ETA EZ, ORDEA, GIPUZKOARREN INTERESAK.

Batzarkide jeltzale Xabier Ezeizabarrenak salatu du, Bilduk Gipuzkoa utzi duela hondakinak tratatzeko azken faserako azpiegiturarik gabe, betiere, araudiaren eta Europar Batasunaren zuzentarauen aurka.

Ingurumeneko eta Lurralde Antolaketako foru diputatu Iñaki Errazkin Batzar Nagusietan agertu da gaur goizean EAJ-PNVk eskatuta. Bertan, Errazkinek azaldu du Gipuzkoako Hondakinen Partzuergoaren (GHK) eta errausketa-instalazioaren eraikuntza-enpresen arteko ituna, hain zuzen ere, errausketa-instalazioa ez eraikitzeko GHK-ren eta enpresen arteko ituna. Horren harira, EAJ-PNVren batzarkide Xabier Ezeizabarrenak Bilduri honakoa leporatu dio: “Bilduren interesak lehenetsi izana eta, ez ordea, gipuzkoarron interesak”.

Horiek horrela, Ezeizabarrenak salatu du, Bilduren eta enpresen arteko akordioak Gipuzkoa utzi duela hondakinak tratatzeko azken faserako azpiegitura gabe. Hau da, Bilduk interes publikoen aurkako akordioa egin du eta, gainera, araudiaren aurka egin du.

Era berean, EAJ-PNVren batzarkideak Iñaki Errazkini segidako kritika egin dio: “Batzar Nagusietan agertu da oposizioak eskatuta eta ez, ordea, bere ekimenez. Jarrera hori ohikoa da, beraz, Errazkinek beste behin agerian utzi du ez dela gardena izaten ari, izan ere, informazioa eta datuak ezkutatu nahian dabil”.

Xabier Ezeizabarrenak, halaber, Iñaki Errazkin foru diputatuari gogoratu dio, Europar Batasunak birziklatu eta konpostatu ezin diren hondakinen balorizazio energetikoaren alde egiten duela. Beraz, Bilduren jarrera kamikazeen jarrera bera da: Europar Batasunaren herrialde aurreratuenen aurka egiten du eta, gainera, Bilduk berak esaten du herrialde horiek oker daudela eta errausketa-instalazio kaltegarriaren mende daudela, eta Bilduk berak bakarrik arrazoia duela.  

Horrenbestez, Ezeizabarrenak segidakoa esan du: “Gipuzkoarron kezka handitzen ari da, baita Bilduren kontraesanak ere; izan ere, 2013.urtearen hasieran Bilduk esan zuen bere helburua zabortegiak ixtea zela eta duela aste batzuk, ordea, guztiz kontrakoa esan zuen, hain zuzen ere, zabortegiak ezinbestekoak direla. Beraz, Iñaki Errazkin Ingurumeneko eta Lurralde Antolaketako foru diputatua gezurretan ari da eta ez du bere benetako pentsaera azaldu nahi. Eta, bien bitartean, Foru Aldundiak erabaki kaltegarria hartu du gipuzkoarron interesen aurka: kaltegarria da, enpresei ordaindutako dirua ezin delako berreskuratu. Kaltegarria da, ez duelako konpontzen hondakinen tratamenduaren arazoa. Eta kaltegarria da, Europar Batasunaren zuzentarauen aurkako erabakia delako – gogoan izan, Europar Batasunak esan duela zabortegiak itxi behar direla –“.

Azkenik, EAJ-PNVren hautetsiak honakoa salatu du: “Bilduren aginteko Foru Aldundiaren erabakiak agerian uzten du muturreko ezker abertzalearen iritzia gailendu dela. Beraz, Iñaki Errazkinek ez ditu bete ez Batzar Nagusien akordioak, ez emandako hitza eta, ondorioz, ez da sinegarria. Gainera, bere helburua da lehengo eredua desegitea – nahiz eta Europar Batasuneko herrialde aurreratuenen eredu bera den – beste plangintzarik egin gabe eta zabortegi berriak non irekiko dituen zehaztu gabe. Eta hori guztia, Europar Batasunaren zuzentarauen eta gipuzkoar gehienen borondatearen aurka”.