EAJ-PNV-REN USTEZ, KAOSA ETA AURREIKUSPEN FALTA KONFIRMATU DIRA LARRAITZ UGARTE MUGIKORTASUN ETA BIDE-AZPIEGITURETAKO FORU DIPUTATUAREN BIDEGIREN KUDEAKETAN

Batzarkide jeltzale Aintzane Oiarbidek Bilduren aginteko Foru Aldundiari kudeaketa txarra leporatu dio, eta Larraitz Ugarte Mugikortasun eta Bide-Azpiegituretako foru diputatuari eskatu dio, azaltzeko nola aurre egingo dion bere aurreikuspenen eta azterketen gabeziaren ondorioz sortutako 4,5 milioi euroko gain-kostuari. 

Mugikortasun eta Bide-Azpiegituretako foru diputatu Larraitz Ugarte eta Bidegiko zuzendari Katy Nevadok Batzar Nagusietan agertu dira gaur goizean. Bertan, EAJ-PNVren batzarkide taldeak eskatuta, azaldu dute Foru Aldundiaren aurreikuspen okerra – hain zuzen, ViaT ordainketa-sistemaren erabiltzaileentzako beherapen-sistemaren gaineko aurreikuspen okerra –, eta, horrek, Bidegiren diru-kutxan izango duen eragina. 

EAJ-PNVren batzarkide Aintzane Oiarbidek segidakoa azpimarratu du: “EAJ-PNV izan zen lehena autobideetako erabiltzaileei beherapenak ezartzen, betiere, beherapen-politika hori babesten zuten txosten tekniko eta ekonomikoetan oinarrituta. Beraz, EAJ-PNV beti egon da beherapenak egitearen alde, hain zuzen, Gipuzkoako autobideetako ohiko erabiltzaile gipuzkoarrei beherapenak egitearen alde”. 

Horren harira, batzarkide jeltzaleak Foru Aldundiari honakoa kritikatu dio: “Beste neurririk bilatu ez izana, tarifa malgua Bidegiko kutxan izaten ari den eraginari aurre egiteko; kontuak gaizki egin izana; eta, gainera, Batzar Nagusietan hartutako erabakiak beste behin bete ez izana”. Hortaz, Oiarbidek gogoratu du, tarifa malgua ezartzeko neurria onartu zenean, EAJ-PNVk Foru Aldundiari eskatu ziola beherapen-sistemak Bidegiko kutxan izango zuen eraginari aurre egiteko neurriak hartzeko. 

Era berean, Oiarbidek azaldu duenez, gain-kostua ez da 400 mila eurokoa izango – gogoan izan, Larraitz Ugartek hori aditzera eman duela eta, beraz, beste behin, gezurra esan duela –, baizik eta ia 4,5 milioi eurokoa. Beraz, Foru Aldundiaren aurreikuspena guztiz okerra izan da edo datuak nahita ezkutatu ditu, hain zuzen ere, Bidegi sozietate publikoaren – Larraitz Ugarte buru dela – kaosa agerian uzten dituzten datuak.

EAJ-PNVaren hautetsiak, halaber, segidakoa esan du: “EAJ-PNVk Larraitz Ugarte foru diputatuari dei egin dio, arduratsua izateko eta txosten teknikoak eta ekonomikoak egiteko, betiere, Bidegi kaudimenduna izaten jarraitzeko, nahiz eta Bilduren kudeaketa Bidegin oso kaskarra den”.

Azkenik, hona hemen Aintzane Oiarbideren hitzak: “EAJ-PNV beherapen politikaren eta ViaT ordainketa-sistemaren alde dago. Beraz, Larraitz Ugarte Mugikortasun eta Bide-Azpiegituretako foru diputatuari eskatzen diogu, lehenbailehen neurriak hartzeko, hain zuzen ere, bere kudeaketa txarrak eragindako kostuei aurre egiteko neurriak hartzeko”.