EAJ-PNV-REN USTEZ, HONDAKINEN GAINEKO BATZORDE BERRIAK AURRE EGINGO DIO BILDUREN GARDENTASUN EZARI

Batzarkide jeltzale Zorione Etxezarraga izango da batzordearen lehendakaria eta, bertan, Gipuzkoan hondakinen kudeaketaren gaineko etorkizuna eta errealitatea ezagutuko dira.

Gipuzkoako Batzar Nagusietako batzarkide-taldeek batzorde berria sortu dute, hain zuzen ere, Gipuzkoan hondakinen kudeaketa aztertzeko batzordea. Batzorde berriaren izena honakoa da: Gipuzkoako Hondakinen Partzuergoaren bilakaera finantziarioari eta irtenbide teknikoei buruzko azterketa-batzordea. EAJ-PNVren batzarkide Zorione Etxezarraga izango da lehendakaria eta bere lana informazioa jasotzea eta batzarkide-taldeei helaraztea izango da, betiere, informazioa aztertzeko eta Batzar Nagusietan eztabaidatzeko, izan ere, Batzar Nagusiek dute eskumena.

Xabier Ezeizabarrena izango da jeltzaleen batzarkide-taldearen bozeramailea batzorde berrian. Ezeizabarrenak berak batzordearen eraketaren ondoren segidako adierazpenak egin ditu: “Gaurtik aurrera hondakinen kudeaketaren egoerari aurre egiteko organoa izango dugu. Bi urte pasa dira Gipuzkoako Hondakinen Partzuergoaren (GHK) ordezkariak aukeratu zirenetik eta partzuergoaren egoera oso larria da: finantzak noraezean daude, GHK-k ez du lortu hondakinen kudeaketaren arazoa konpontzea eta, gainera, ez du bermatuta bere segurtasun juridikoa.

Horren harira, EAJ-PNVren batzarkideak gogorarazi du, Bilduren aginteko Foru Aldundia GHK-ren partaide dela eta partzuergoaren gobernuaren herena ordezkatzen duela. Eta, hain zuzen ere, nahiz eta Batzar Nagusien gehiengoak Bilduri onartutakoa eta araudia errespetatzeko eskatu dion, Bilduren aginteko GHK-k alde bakarreko politika egiten jarraitu du eta bizkar eman die partzuergoan sortutako arazoei.  Horrenbestez, Xabier Ezeizabarrenak honakoa esan du: “Batzorde berriak Bilduren gardentasun ezari aurre egingo dio. Izan ere, Bilduk datuak nahita ezkutatu ditu eta helburu bakarra izan du: bere iritzia inposatzea, gipuzkoar gehienen iritziaren aurka”.

Era berean, Ezeizabarrenak salatu du, egun bistakoa dela Gipuzkoako Hondakinen Partzuergoak ez duela bermatuta bere finantza- eta zuzenbide-segurtasuna eta, ondorioz, diru asko galdu dezakeela, hain zuzen ere, Gipuzkoako erakundeek bere gain hartu ezingo luketen diru-kopurua. Hori dela eta, batzorde berriak horrelako gaiak egiaztatuko ditu, datu guztiak izateko eta aztertzeko eta, betiere, helburua segidakoa izango da: Bilduk kudeaketa kaskarra egiteari uztea, izan ere, gaia oso teknikoa da, hain zuzen ere, EAJ-PNVren ustez, alderdi guztien artean heldu beharreko gaia.

EAJ-PNVren hautetsiak, halaber, honakoa gogorarazi du: “GHK ezkutatzen saiatu da ezker abertzalearen alde bakarreko erabakia, hain zuzen ere, Zubietako errausketa-instalazioa ez eraikitzeko erabakia. Eta, horretarako, instalazioak Ingurumeneko Baimen Bateratua ez zuela betetzen esan zuen. Baina errealitatea bestelakoa da: Eusko Jaurlaritzak gezurtatu zuen ezker abertzaleak ezkutatu nahi izan zuen argudioa, betiere, ezkutuan errausketa-instalazioaren enpresa eraikitzaileekin milioika euroko kalte-ordainak hitzartzeko, errausketa-instalazioa ez eraikitzeko”.

Azkenik, hona hemen Xabier Ezeizabarrenaren hitzak: “Bien bitartean, Bilduren proposamenari buruz ezer gehiago jakin gabe jarraitzen dugu. Jakin izan dugun gauza bakarra da hondakin fardelak biltzeko guneak irekiko dituela, hau da, zabortegi berriak irekiko dituela eta, hori, hain zuzen ere, Europar Batasunaren zuzentarauen aurkako erabakia dela. Gogoan izan, gainera, Bilduren plangintzaren berri hitzaldi batean izan genuela, izan ere Bilduk ez du Batzar Nagusietako erregistroan dokumenturik aurkeztu, bertan eztabaidatu ahal izateko. Eta Batzar Nagusiek dute arlo horretan eskumena. Beraz, batzorde berriari esker, Gipuzkoan hondakinen kudeaketaren gaineko etorkizuna eta errealitatea ezagutuko dira.”.