EAJ-PNV-K FORU ALDUNDIARI ESKATU DIO DESOREKAK ZUZENTZEKO KIROL INSTALAZIOETARAKO DIRU-LAGUNTZETAN

Batzarkide jeltzale Arantza Rojok Bilduren aginteko Foru Aldundiari eskatu dio, erabilitako irizpideak eta baremazioa argitzeko kirol-instalazioei diru-laguntzak emateko.

Gaur arratsaldean, Gipuzkoako Batzar Nagusiek Foru Aldundiari segidakoa eskatu diote: Kirol-Instalazioetarako 2014-2016ko Plangintzan aurreikusitako diru-laguntzak modu orekatu batean banatzeko. Eta, horretarako, segidako irizpideak erabiltzeko: instalazioen antzinatasuna; instalazio bakoitzaren zerbitzuak; eta instalazio bakoitzaren erabiltzaile kopurua.

EAJ-PNVk egin du proposamena eta PSErekin adostasuna lortu du proposamenak aurrera egiteko. Proposamenak, era berean, Foru Aldundiari eskatzen dio desorekak zuzentzeko Kirol-Instalazioen Plangintzan jasotako diru-laguntzetan. Horren harira, EAJ-PNVren batzarkide Arantza Rojok Bilduren aginteko Foru Aldundiari eskatu dio, desorekak zuzentzeko, izan ere diru-laguntzen banaketak Donostia bezalako hiriei kalte egiten die.

Horiek horrela, Rojok honakoa azaldu du: “Harrigarria da Foru Aldundiak Donostiari ematea Kirol-Instalazioen Plangintzaren diru-laguntzen aurrekontuaren %3 baino gutxiago. Izan ere, Donostiako kirol-instalazioek donostiarrei zerbitzua emateaz gain, gipuzkoar gehiagori ere zerbitzua ematen diete. Eta, batez ere, Donostia inguruko hainbat herritarrek erabiltzen dituzte ere kirol-instalazioak, bere herrietan horrelako lekurik ez dutelako”.

Era berean, EAJ-PNVren batzarkideak segidakoa adierazi du: “Ez dugu ulertzen zein irizpide erabili dituen Foru Aldundiak proiektuen artean diru-laguntzak emateko, ezta zein baremazio erabili duen. Gainera, ez dugu ulertzen zein irizpide erabili dituen Foru Aldundiak proiektuak eta udalerriak aukeratzeko”. Hori dela eta, Arantza Rojok Foru Aldundiari eskatu dio, diru-laguntzak emateko irizpideak eta baremazioa argitzeko.

Azkenik, Arantza Rojok Foru Aldundiari honakoa eskatu dio: “Diru-laguntzak modu orekatuan banatzeko eta, horretarako, kontuan hartzeko diruz lagundu beharreko instalazioetako udalerrietako herritar kopurua, instalazio bakoitzaren erabilera eta instalazioaren antzinatasuna. Horrenbestez, esaterako, Donostiako Altza auzoko kirol-instalazioek – egun obretan dago 2016 arte – diru-laguntzak jasotzeko aukera izango lukete. Gogoan izan, Altzako instalazioak 30 urte baino gehiago dituela eta Donostiako auzo handienetako hiritarrei zerbitzua ematen diela”.