EAJ-PNV-K SALATU DU IÑAKI ERRAZKIN FORU DIPUTATUAK EZ DUELA ZESTOAKO ZABORTEGIAREN BERME TEKNIKORIK EMAN

Batzarkide jeltzale Xabier Ezeizabarrenak salatu du, gaur agerian gelditu dela Bilduren aginteko foru gobernuaren iruzurra: Foru Aldundiak Osinbeltzen utzi nahi dituen hondakinak ez dira bizigabeak. Izan ere, baldin eta bizigabeak badira zergatik iragazgaiztu behar da harrobia?”.

Ingurumeneko eta Lurralde Antolaketa foru diputatu Iñaki Errazkin Batzar Nagusietako izen bereko batzordean parte hartu du gaur eguerdian. Bertan, Foru Aldundiaren erabakiaren berri eman du, hain zuzen ere, Zestoako Osinbeltz harrobia zabortegian bihurtzeko erabakiaren berri. Behin batzordea amaituta, EAJ-PNVren batzarkide Xabier Ezeizabarrenak honakoa salatu du: “Iñaki Errazkinek ez du Zestoako zabortegiaren berme teknikorik eman, baizik eta bakarrik hipotesiak aipatu ditu eta ez du dokumentaziorik ekarri. Beraz, Errazkin foru diputatuaren planak Gipuzkoarentzako esperientzia pilotua izaten jarraitzen du”.

Horren harira, Ezeizabarrenak salatu du, gaur agerian gelditu dela Bilduren aginteko foru gobernuaren iruzurra. Izan ere, gaur Iñaki Errazkinek esan du hondakinak bizigabeak balira bezala tratatuko direla. Beraz, Foru Aldundiak Osinbeltzen utzi nahi dituen hondakinak ez dira bizigabeak. Izan ere, baldin eta bizigabeak badira zergatik iragazgaiztu behar da harrobia? Gainera, Gipuzkoan badago hondakin bizigabeak uzteko zabortegirik; beraz, are ulertezina da beste zabortegi bat irekitzea eta bizigabeak ez diren hondakinak bizigabeak balira bezala tratatzea.

Era berean, EAJ-PNVren batzarkideak Ingurumeneko eta Lurralde Antolaketako foru diputatuaren jarrera salatu du: “Lehenengo aldiz etorri da Gipuzkoako Batzar Nagusietan Osinbeltz harrobiari buruz hitz egitera eta, gainera, ez du egin bere borondatez, baizik eta oposizioak eskatuta. Beraz, Batzar Nagusiei errespetua galtzea da esatea nekatua dagoela gaiari buruz hitz egiten. Gainera, foru diputatuak bere hitzaldian ez die erantzun batzarkide taldeen galderei, izan ere, beste gai batzuk aipatu ditu eta oposizioari oposizioa egiten aritu da”.

Xabier Ezeizabarrenak, halaber, segidakoa salatu du: “Gertakari berri baten aurrean gaude: Iñaki Errazkinek Alemaniako legedia ezarri nahi du eta ez, ordea, Gipuzkoako Batzar Nagusien gehiengoak onartutako Foru Araua. Hau da, Iñaki Errazkinek berriro argi esan du ez duela beteko hondakinak kudeatzeko indarreko foru araua eta hondakinen kudeaketan Europako lurralde aurreratuenetako baten legedia ezarriko duela; eta, hain zuzen ere, Alemanian hondakinen tratamenduaren azken fasea egiteko balorizazio energetikoa erabiltzen dute”.

Azkenik, Ezeizabarrenak Gipuzkoan utzitako harrobien birsorkuntzari buruz hitz egin du: “Egia da Euskadiko harrobiak birsortzeko plangintza dagoela, baina plangintza horrek birsortzeari buruz hitz egiten du eta ez, ordea, zabortegi berriak egiteari buruz”. Hortaz, EAJ-PNVren batzarkideak Iñaki Errazkini honakoa eskatu dio: “Lehenik, gaia gehiago ez nahasteko; bigarrenik, baldin eta informazio teknikoa badu Batzar Nagusietan emateko; eta azkenik, aurrerapausoa egiteko, izan ere denborak aurrera darrai eta egun ez du hondakinak tratatzeko plantarik eraiki eta martxan jarri”.