26 de noviembre de 2014

EAJ-PNV-K SALATU DU BILDUK LEGEAREN KONTRA ZABORTEGIAK IREKITA MANTENDU ETA BERRIAK IREKI NAHI DITUELA



Batzarkide jeltzale Xabier Ezeizabarrenak salatu du, Bilduk Zestoan dagoeneko hartu duen erabaki bati buruz kontsulta egin nahi duela. Hori al da bere parte-hartze eredua?”.



Ingurumeneko eta Lurralde Antolaketako foru diputatu Iñaki Errazkinek Gipuzkoako Batzar Nagusietako izen bereko batzordean parte hartu du gaur goizean. Bertan, Hondakinen gaineko azpiegituren Lurraldearen Arloko Planaren (PTS delakoa) aldaketari buruzko azalpenak eman ditu, hain zuzen ere, Zestoako Osinbeltz harrobian Foru Aldundiak ireki nahi duen zabortegia sartzeko. Foru diputatuak batzordean parte hartu du EAJ-PNVk eskatuta. Batzarkide jeltzale Xabier Ezeizabarrenak salatu du, Iñaki Errazkinek ez duela batzordean bere borondatez parte hartu eta, gainera, Batzar Nagusiei behin eta berriro bizkar eman diela.

Ezeizabarrenaren ustez, Errazkinek ez die Batzar Nagusiei PTS delakoaren aldaketari buruzko txostenik bidali. Gainera, ez du argitaratu ez Gipuzkoako Aldizkari Ofizialean ezta Gipuzkoako egunkarietan, baizik eta Ingurumeneko departamentuaren atarian lotura txiki bat jarri du. Horren harira, batzarkide jeltzaleak honakoa salatu du: “Ingurumeneko foru diputatua ez da gardena izan”.

Era berean, Xabier Ezeizabarrenak salatu du, Bilduk legearen kontra zabortegiak irekita mantendu eta berriak ireki nahi dituela, eta Errazkin foru diputatuari honakoa eskatu dio: “Herritarrei iruzurrik ez egiteko eta esateko zabortegiak ixteko epeak ez direla beteko”. Hortaz, Ezeizabarrenak Ingurumeneko foru diputatuari segidakoa ohartarazi dio: “Baldin eta PTS delakoa aldatzeko foru dekretua erabiltzen badu, legea urratuko du, izan ere ez du kontuan izango arauen hierarkia. Horrenbestez, Bilduk ez du PIGRUG hondakin plangintza arautzen duen 7/2008 Foru Araua kontuan hartu nahi, nahiz eta foru dekretua baino maila handiko araua den. Beraz, horrek erakusten du Bilduren kudeatzeko modua: Foru araua aldatzeko gehiengoa ez duenez, Batzar Nagusiei bizkar ematen die aldaketa egiten saiatzeko”.

EAJ-PNVren batzarkideak, halaber, segidakoa esan du: “PTS delakoaren aurrerapen dokumentuak ez du ia aipatzen Osinbeltz harrobiko zabortegiak Urola Ibadan izango duen eragina. Eta gainera, dokumentuak berak dio harrobian sartuko diren hondakinak ez direla bizigabeak eta kokalekua ez dela onena. Eta horrek guztiak zalantza juridikoak, politikoak eta teknikoak sortzen dizkigu. Beraz, Bilduk gaia arduragabekeriaz kudeatu du”.

Azkenik, hona hemen Xabier Ezeizabarrenaren hitzak: “Foru Aldundiak behin erabakia hartuta Zestoan kontsulta egin nahi du. PTS delakoa aldatzeko aurrerapen dokumentuan agerian gelditzen da zabortegia irekitzeko erabakia hartu duela. Beraz, zein izango da kontsultaren galdera? Izan ere, hartutako erabaki bati buruz galdetuko die zestoarrei eta, horrek, erakusten du zein den Bilduren benetako parte-hartzearen eredua: bere burua zuretzeko herritarrei galdetuko die, baina emaitza zeinahi den Bilduk bere iritzia inposatuko die”.

No hay comentarios:

Publicar un comentario