EAJ-PNV-REN USTEZ, GIPUZKOAKO FORU ALDUNDIAK EZ DU KRISIARI AURRE EGITEKO NEURRIRIK ZEHAZTU

Markel Olano jeltzaleen bozeramailea kritika zorrotza egin du, ekonomia sustatzeko baliabideak asko murriztu direlako. Olanoren ustez, gire gizarteak egoera oso larria bizi du eta Foru Aldundiak egoera horri ez dio erantzuten.

2013ko aurrekontuak azaltzeko agertu dira Batzar Nagusietan Gipuzkoako Foru Aldundiaren diputatu guztiak. Martin Garitano diputatu nagusiak eta Helena Franco Ogasun diputatuak hitz egin ostean, Markel Olano EAJ-PNV batzarkide taldearen bozeramaileak honakoa esan du: “Foru Aldundiaren ekonomia-ikuspegia ez da egokia krisiari aurre egiteko”.

Ildo beretik, Olanoren aburuz, “kezka handia dugu, ekonomia-sustatzeko baliabideak asko murriztu direlako. Hain zuzen, enpresei laguntzeko zegoen 8milioi euroko aurrekontu-saila bertan behera gelditu da”. Horrenbestez, Markel Olanok salatu du, “Foru Aldundiak ez duela ez proiekturik ez ideiarik ekonomia-sustapenerako”.

Era berean, jeltzaleen bozeramaileak segidakoa adierazi du: “Jeitsiera nabarmenik egon bada, hori Berrikuntza departamentukoa izan da, hain zuzen, %24,43”. Horren harira, Markel Olanoren ustez, “Berrikuntza departamentuaren papera oso garrantzitsua da krisi-egoera konpontzeko, baina, dirudienez, ez da Foru Aldundiaren lehentasuna”.

Halaber, Olanoren iritziz, “finantzaketa-egoera dela eta, enpresak ekonomia-egoera larrian daude. Foru Aldundiak, ordea, ez ditu tresna bereziak enpresen egoera horri aurre egiteko. Hau da, ez dago lidergorik krisiari aurre egiteko”.

Amaitzeko, Markel Olanok ekonomia-sustatzeko Foru Aldundiaren egitekoari buruz hitz egin du: “Aldundiak egiteko garrantzitsua du, baina aitzakiak erabiltzen ditu egin beharrekoa ez egiteko”. Horrenbestez, EAJ-PNVren eledunak Bilduren aginteko Foru Aldundiaren jarrera salatu du: “Komeni zaionean egingo diren azpiegiturak egokiak dira lurraldea orekatzeko eta, aldiz, komeni ez zaionean azpiegitura horiek erraldoiak eta herriaren borondatearen aurkakoak dira”.