EAJ-PNV-REN USTEZ, EKONOMIAREN GARAPENERAKO TALDE TXOSTENGILEAREN ASMOA HANDIAGOKOA IZAN ZITEKEEN ETA PLAN BAT ONARTU ZEZAKEEN

Eider Mendoza batzarkide jeltzaleak salatu du Foru Aldundiak ez dituela kontuan hartu alderdi politikoen eta ekonomiaren zein gizartearen eragileen ekarpenak kontuan hartzeko.

Gipuzkoako Foru Aldundiak gaur goizean aurkeztu du ekonomiaren garapenerako talde txostengilearen ondorioak, 7,6 milioi euroko aurrekontu-saila bideratzeko. Dokumentua aztertu ondoren, EAJ-PNVren batzarkide Eider Mendozak honakoa esn du: “EAJ-PNVk Gipuzkoako ekonomiaren garapenerako 7,6 milioi euroko aurrekontu-saila eta talde txostengilea sortzea babestu zituen; nahiz eta krisiari aurre egiteko nahikoa ez den. Hau da, Bilduren aginteko Foru Aldundiak ez du planik ez estrategiarik krisiari aurre egiteko”.

Ildo beretik, Mendozak salatu du, Bilduk ez duela borondaterik izan gainerako taldeekin adosteko 7,6 milioi euro horiek zertara bideratu. Hori dela eta, batzarkide jeltzalearen iritziz, talde txostengilea antzezlana baino ez da izan. Izan ere, Bilduk aurrekontua onartzeko egindako itunean jarritakoa soilik onartu du, eta ez ditu kontuan izan gainerako alderdien zein ekonomiaren eta gizartearen eragileen ekarpenak”.

Era berean, EAJ-PNVren hautetsiak salatu du, talde txostengileak Bilduren benetako aurpegia erakutsi duela, herritarren parte-hartzearen gainean. Hau da, Bilduren ustez, parte-hartzea herritarrekin egotea da eta ez beste ezer gehiago. Eta hori da, hain zuzen, gaur gertatutakoaren argazkia: Bilduren aginteko gobernuak ez du ez ekimenik, ez borondaterik gainerakoen ekarpenak kontuan hartzeko”.

Halaber, Eider Mendozak azpimarratu du, beste behin, egoerak legealdi osorako plangintza egitea behartzen duela. Bilduren aginteko Foru Aldundiak ordea, ez ditu kontuan hartuko gizartearen eta ekonomiaren eragileen ekarpenak legealdi osorako krisiari aurre egiteko plana egiteko. Gogoan izan, Batzar Nagusiek hori eskatu ziotela eta Bilduk ez zuela ere eskari hori aintzat hartu.

Azkenik, Mendozak Bilduri gogorarazi dio, bere aurrekontu-proposamenean ez zegoela krisiari aurre egiteko aurrekontu-sailik, beraz, ezin diola EAJ-PNVri leziorik eman, izan ere jeltzaleen aginteko Eusko Jaurlaritzak plangintza jarri du, helburu, estrategia, egutegia eta guzti, gobernua iritsi eta 100 egun igaro baino lehen. Horregatik guztiagatik, EAJ-PNVren batzarkideak segidakoa esan du: “Baldin eta, orain, Bilduren aginteko gobernuarentzat aurrekontu-saila hori hain garrantzitsua bada, zergatik ez zuen bete Batzar Nagusien gehiengoak legealdiaren hasieran eskatutakoa? Hau da, Bilduk, beste behin, argi utzi du noraezean dabilela eta bat bateko erabakiak hartzen dituela”.