EAJ-PNV-K FORU ALDUNDIARI ESKATU DIO, MUGI TXARTELA ORAINDIK JASO EZ DUTEN ERABILTZAILEEI KALTE-ORDAINAK ORDAINTZEKO

Joseba Antxustegi batzarkide jeltzaleak salatu du, Mugi txartelaren ezarketa kaosa izaten ari dela, Foru Aldundiaren aurreikuspen faltagatik eta kudeaketarako gaitasun ezagatik.

EAJ-PNVren batzarkide taldeak bat egin du Mugi garraio-publikoaren txartelaren erabiltzaileek azaldutako kexuekin eta Foru Aldundiari eskatu dio, eragozpenak konpontzeko lan egiteko. Joseba Antxustegi batzarkide jeltzaleak salatu du, Foru Aldundiak ez duela aurreikuspenik izan eta, ondorioz, Mugi txartelaren ezarketa kaosa izaten ari dela. Horren harira, Antxustegik honakoa esan du: “Foru Aldundiak presa handia izan du txartel bakarra ezartzeko. Ez du zer gertatuko zen jakiteko aurreko azterketarik egin eta, ondorioz, garraio-publikoaren erabiltzaileei kalte egiten ari zaie”.

Era berean, jeltzaleen batzarkidearen iritziz, “Mugi txartela eskatzeko eta dirua sartzeko saltokietan haserre daude, denbora luzea igarotzen delako txartela eskatzen denetik jasotzen den arte”. Ildo bertik, segidakoa azpimarratu du: “Foru Aldundia ez da gai izaten ari eskari guztiak erantzuteko eta, ondorioz, erabiltzaileei kalte egiten ari zaie, izan ere, bidaiak osorik ordaintzen ari dira, beherapenik gabe. Gainera, hainbestekoa da kaosa, non erabiltzailearena arreta zerbitzua – bai bulegoa, bai telefonoa - gainezka dagoen. Horren aurrean ere Foru Aldundiak ez du erantzunik eman”. Hori dela eta, Joseba Antxustegik Bilduren aginteko Foru Aldundiari eskatu dio, kaltetutako erabiltzaileei – hain zuzen ere, Mugi txartela eskatuta duten eta jaso ez dutenei – kalte-ordainak ordaintzeko, izan ere, egoera onartezina da.

Halaber, EAJ-PNVren hautetsiak honakoa salatu du: “Foru Aldundiak Mallabia-Ondarroa autobus zerbitzuko erabiltzaileak beherapen politikatik kanpo utzi ditu – gogoan izan, orain arte Lurraldebus txartelarekin beherapenak zituztela –, bizkaitarrak direlako. Gure ustez, aldundiak erabiltzaile hauekin ere arreta izan behar du, izan ere, zerbitzu hori da, esaterako, erabiltzaile horiek Mendaroko ospitalera joateko duten aukera bakarra”.

Azkenik, Joseba Antxustegik Bilduren aginteko Foru Aldundiari eskatu dio, esfortzua egiteko RENFE txartel bakarraren sisteman sartzeko. Antxustegiren iritziz, helburu hori lortzeko Foru Aldundiak lan gehiago egin beharko luke, izan ere RENFE gabe Gipuzkoako garraio-publikoaren erabiltzaileen zati handi bat Mugi txartelaren beherapenetik kanpo gelditzen da.