EAJ-PNV-K SALATU DU BILDUREN LIDERGO ETA PLANGINTZA FALTA KRISIARI AURRE EGITEKO

Jeltzaleen batzarkide taldearen bozeramaile Markel Olanoren iritziz, azkeneko bi urteetan Bilduk ez du ezer egin krisiari aurre egiteko.

EAJ-PNV batzarkide taldearen bozeramaile Markel Olanok eta Eider Mendoza batzarkide jeltzaleak prentsaurrekoa egin dute gaur goizean. Bertan, atzoko Bilduren aginteko Foru Aldundiaren prentsaurrekoa aztertu dute, non eta, Gipuzkoa Saretzen ekimena eta Lurralde Garapenaren zuzendaritza – Diputatu Nagusiaren kabinetearen barruan izango da – aurkeztu zuten. EAJ-PNVren batzarkide Eider Mendozak honakoa esan du: “Bilduren aginteko Foru Aldundiak 2011n iragarri zuen Gipuzkoa Saretzen ekimena martxan jarriko zuela Gipuzkoa Aurrera ordezkatzeko, ez zutelako gustuko. Gainera, Foru Aldundiak berak iragarri zuen ekimen hori krisiari aurre egiteko proiekturik garrantzitsuena izango zela. Beraz, Gipuzkoa Saretzen martxan jarriko zuela iragarri zuenetik jarraipen zehatza egin diogu”.

 

Ildo beretik, Mendozak gogoratu du, orduan, Foru Aldundiak esan zuela bailara bakoitzaren beharrak eta gabeziak aztertuko zituela, krisiari aurre egiteko proiektuak garatzeko. Hala ere, nahiz eta Bilduk esan zuen Foru Aldundiak berak prozesu horren lidergoa izan behar zuela, ez du ezer egin eta, ondorioz, bi urteren ondoren, hasierako egoerara bueltatu gara. Hori dela eta, EAJ-PNVren batzarkidearen iritziz, argi gelditu da Bilduk ez duela ezer egin krisiari aurre egiteko eta ez duela gaia lehenensten; izan ere Gipuzkoa Saretzen ekimenaren sorrera iragarri eta bi urte igaro eta gero, Lurralde Garapenaren zuzendaritza egin du, eta zuzendaritza horrek egingo duen lehenengo gauza bailaretako egoera aztertzea izango da.  

Era berean, EAJ-PNV batzarkide taldearen bozeramaile Markel Olanok Eider Mendozaren iritziarekin bat egin du eta Bilduri bikoizketa sortu izana egotzi dio, izan ere, Lurralde Garapenaren zuzendaritzaren eginbeharrak, Berrikuntza departamentuaren eskumenak dira. Beraz, ezer ere ez egiteko bikoizketa egingo den lehenengo aldia izango da.

Horrenbestez, Olanok segidakoa azpimarratu du: “Beste behin ere, argi geratu da Bilduk ez duela plangintzarik, besteak beste, zuzendaritza berria egin duelako, aurrekontu-sailik eman ez diolako eta guztia berriro modu sakonean aztertuko duelako”. EAJ-PNVren bozeramailearen iritziz, azkeneko bi urteetan Bilduk ez du ezer egin krisiari aurre egiteko eta guztia gelditu du azterketa egin omen behar duelako”.

Horiek horrela, Markel Olanok esan du, bi kudeaketa eredu daudela – Martin Garitano diputatu nagusiak ere gauza bera esan du –: “Alde batetik, Bilduren eredua dago, hain zuzen ere, guztia gelditzeko eredua eta ondorio nahiko larriak izango dituena; eta bestetik, EAJ- PNVren eredua; hau da, plangintzaren eredua eta, hain zuzen ere, eredu ona, lehengo legealdian ikusi ahal izan zen bezala  - bost hilabeteetan ekintza plana egin zuen EAJ-PNVren aginteko Foru Aldundiak eta, ondorioz, Gipuzkoa Aurrera ekimena martxan jarri zuen – edota, egun, Eusko Jaurlaritzak ere erabiltzen duen eredua – bi plangintza egin ditu ehun egunetan ekonomia eta enplegua sustatzeko –“.

Azkenik, hona hemen EAJ-PNV batzarkide taldearen eledunaren hitzak: “Gipuzkoako ekonomiaren egoera oso larria da; izan ere, 50.000 langabetu baino gehiago daude eta enpresen egoera ere zaila da. Horri aurre egiteko, Bilduren aginteko Foru Aldundiak bat bateko erabakiak hartu ditu eta, gainera, ez du agindutakoa bete. Ondorioz, egoera larriagoa da”. Markel Olanoren ustez, Bilduri eta ezker abertzaleari ez die axola egoera larri hau eta, gaiari behar den garrantzia eman ordez, beste gauza batzuri buruz hitz egiten du”. 

Ekonomia sustatzeko Foru Araua.

Bestalde, kazetariek Markel Olanori galdetu diote ekonomia sustatzeko EAJ-PNVk egingo duen Foru Arauari buruz: “Gizartearen eta ekonomiaren eragileekin egon ondoren, dokumentua egin dugu eta forma juridikoa emango diogu Batzar Nagusietan aurkezteko”. Olanok esan duenez, eragileek pozik hartu dute EAJ-PNVren proposamena, izan ere Gipuzkoaren egoeragatik eta bilduren ekintza faltagatik kezkatuta daude”.